म्याग्दी। बेनी नगरपालिका–१ ढाँडथर निवासी विपत्र समुदायले रातोमाटोलाई आयस्रोतको मुख्य आधार बनाएका छन् ।
आफ्नै घरनजिकको पाखामा खेर गइरहेको रातोमाटोलाई उनीहरूले आम्दानीको स्रोत बनाएका हुन् । रातोमाटोलाई पाथी र मानाको हिसाबमा बिक्री गर्दै आएका रत्नेचौरकी मिना विकले पाथीको रु ५० देखि रु८० सम्ममा बिक्री गर्ने गरेको बताइन् ।
त्यस्तै घर खर्च टार्न र बालबालिकाको पढाइ खर्च जुटाउनका लागि पनि माटोको व्यवसाय सहज भएको सोही स्थान निवासी कृष्णवहादुर विकले बताए ।
‘दिनभरी रातोमाटोको खाल्डोमा बसेर रातोमाटो निकाल्छौं र बजारमा ल्याएर बिक्री गर्छौ, आम्दानी पनि राम्रै छ’, रातोमाटो बिक्री गर्ने क्रममा सदरमुकाम आइपुगेकी मीनाले बताइन् ।
रातोमाटो निकाल्ने ठाउँमै आउने ग्राहकलाई रु२०मा र सदरमुकाम पु¥याएको माटोलाई एक पाथीको रु५० देखि रु८० सम्ममा बेच्ने गरेको उनको भनाइ छ ।
विगत सात वर्षदेखि माटो बिक्री गर्दै आएकी तिलमाया विकले माटो बिक्री गरेर नै महिनामा रु चार हजारदेखि पाँच हजारसम्म आम्दानी गर्ने गरेको र यसबाट नै आफ्ना छोराछोरीको पढाइ खर्च र घर व्यवहार टार्ने गरेको बताइन् ।
म्याग्दीकै रातोमाटोको लागि प्रसिद्ध मानिने सोही स्थानका करिब २० घर परिवारले यो पेसालाई प्राथमिकता दिँदै आएका छन् ।
प्रकाशित मितिः २०७३ कार्तिक १५
वि.सं.२०७३ कात्तिक १५ सोमवार १६:३१ मा प्रकाशित
