काठमाडौँ । नेकपा (एमाले) का नेता माधवकुमार नेपालले मुलुकलाई विकसित राष्ट्र बनाउन जनताले अब वाम गठबन्धनलाई मतदान गर्नुपर्नेमा जोड दिएका छन् ।
वाम गठबन्धनले कोटेश्वरमा आज आयोजना गरेको चुनावीसभामा उनले देशमा स्थिर सरकार र जनतालाई समृद्ध बनाउन अब देशमा वाम गठबन्धनको नेतृत्वमा सरकार बन्ने निश्चित भएको बताए ।
काठमाडौँ–२ बाट प्रतिनिधिसभा सदस्यका उम्मेदवार उनले मुलुकमा लोकतान्त्रिक व्यवस्था कायम गरी जनतालाई अधिकार प्रदान गर्न वाम शक्तिले ठूलो संघर्ष गरेको बताउँदै उक्त गठबन्धन अधिनायकवादी चरित्रको नहुने बताए ।
एमालेका पोलिटब्युरो सदस्य अग्नि खरेलले देशमा राजनीतिक क्रान्ति पूरा भएकाले अब आर्थिक विकासका लागि औद्योगिक क्षेत्रको विकास गरी नागरिकलाई समृद्ध बनाउने प्रष्ट दृष्टिकोण उक्त गठबन्धनसँग रहेको बताए ।
उद्योगराज्यमन्त्री रेशम लामाले मुलुकमा जनताले राजनीतिक स्थायित्व र परिवर्तन खोजिरहेकाले त्यसको उत्तम विकल्प भनेको वाम गठबन्धन भएको टिप्पणी गरे ।
प्रदेशसभा (क) का उम्मेदवार सानुकुमार श्रेष्ठले सरकारले त्रिभुवन अन्तर्राष्ट्रिय विमानस्थललाई मापदण्ड वृद्धि गर्न स्थानीयको १४० रोपनी जग्गा अतिक्रमण गरेकाले प्रचलित मूल्यअनुसार उनीहरुलाई क्षतिपूर्ति उपलब्ध गराउन माग गरे । ख का उम्मेदवार मणिराज फुँयालले दार्शनिक दृष्टिकोण निकट रहेका वभिन्न वाम शक्तिबीच भएको गठबन्धनले नागरिकलाई आर्थिक पहुँच वृद्धि गरी मुलुकलाई समृद्धतर्फ लैजाने प्रतिबद्धता व्यक्त गरे ।
नेकपा (माओवादी केन्द्र) का नेता कुमार पौडेलले राजनीतिक स्थायित्व, आर्थिक समृद्धि, सुशासन र सामाजिक न्यायका लागि वाम गठबन्धनको विजय अपरिहार्य रहेको बताए ।
प्रकाशित मिति : १८ मंसिर २०७४
वि.सं.२०७४ मंसिर १८ सोमवार २२:२२ मा प्रकाशित
