काठमाण्डौं । तपाई सेयर बजारको लगानीकर्ता हो ? यदि हो भने तपाईसँग कुन कुन कम्पनीको सेयर छ ? अहिले सेयर बजारमा हकप्रदको लहड चलिरहेकोछ । पुँजी बृद्धिका लागि कम्पनीहरुले हकप्रद सेयर बजारमा ल्याइरहेका छन् । अझै बजारमा साँढे चार अर्ब रुपैयाँभन्दा बढीको हकप्रद सेयर आउँदैछ । कतै तपाईले सेयर लिनुभएको कम्पनीको पनि हकप्रद आउँदै त छैन ?
धितोपत्र बोर्डमा हकप्रद सेयर निष्कासन गर्न माग गर्दै विभिन्न ११ वटा कम्पनीले आवेदन दिएका छन् । जस अनुसार चार अर्ब ५४ करोड १० लाख ३६ हजार आठ सय २७ रूपैयाँको चार करोड ५४ लाख १० हजार तीन सय ६८ कित्ता हकप्रद सेयर बजारमा आउनेछ ।
यतिबेला हकप्रद निष्कासन गर्न धितोपत्र बोर्डमा आवेदन माग्ने कम्पनीहरूमा सानिमा माई हाइड्रोपावर, डिप्रोक्स लघुवित्त विकास बैंक, भार्गव विकास बैंक, नेरुडे लघुवित्त, सिद्धार्थ इन्सुरेन्स, कैलाश विकास बैंक छन् । यसैगरी, नेको इन्सुरेन्स, ललितपुर फाइनान्स, अपि पावर कम्पनी, कामना विकास बैंक र सेन्ट्रल फाइनान्स पनि पुँजी बढाउन हकप्रदको बाटोमा लागेका छन् ।
थाहा पाइराख्नुहोस्, सानिमा माई, भार्गव, नेको इन्सुरेन्स, डिप्रोक्स लघुवित्त र ललितपुर फाइनान्सले एक सय प्रतिशत हकप्रद ल्याउने तयारी गरेका छन् ।
२४ मंसिर २०७३, ११।००
वि.सं.२०७३ मंसिर २४ शुक्रवार १८:२५ मा प्रकाशित
