काठमाण्डौं । बजारमा दुई कम्पनीले हकप्रद सेयर बिक्री खुला गर्ने भएका छन् । मन्जुश्री फाइनान्स र देवः विकास बैंकले आफ्ना सेयरधनीहरुका लागि हकप्रद सेयर निस्कासन गर्न लागेका हुन् ।
मन्जुश्रीले एक सय ७५ प्रतिशत हकप्रद सेयर निष्कासन खुला गर्ने भएको छ भने देवः विकास बैंकले प्रत्येक दुई सेयर बराबर एक सेयर (२: १) अनुपातमा प्रतिकित्ता एक सय रुपैयाँ दरको ४४ लाख पाँच हजार चार सय ४०.३९ कित्ता हकप्रद सेयर बिक्री खुला गर्न लागेको छ ।
मन्जुश्रीले माघ ६ देखि गतेदेखि एक सेयर बराबर थप १.७५ कित्ता हकप्रद सेयर बिक्री गर्न लागेको हो । यो हकप्रद सेयरमा पुस ८ गतेसम्म कायम रहेका सेयरधनीले मात्र आवेदन दिन सक्नेछन् ।
हकप्रद सेयर आवदेनका लागि एस क्यापिटल लिमिटेड लालदरबार काठमाडौँ, एस डेभलपमेन्ट बैंक नक्सालसहित यसका सम्पूर्ण शाखाहरू, मन्जुश्री फाइनान्सको नयाँ बानेश्वरसहित सबै शाखा कार्यालयबाट सेयर भर्न सकिनेछ । त्यस्तै, त्रिवेणी विकास बैंकको पाल्पा, बेसीसहर, पनौती, इटहरी र भकुण्डेबेसी, गरिमा विकास बैंकको पोखरा, बाग्लुङ, बेनी र मुग्लिङ शाखा कार्यालय अनि महाकाली विकाश बैंकको महेन्द्रनगर शाखा कार्यालयबाट समेत सेयर आवेदन दिन सकिने व्यवस्था गरिएको छ । मन्जुश्रीको बिक्री प्रबन्धकमा एस क्यापिटल लिमिटेड रहेको छ ।
त्यस्तै, देवः विकास बैंकले हकप्रद सेयरमा पुस १८ गतेसम्म कायम सेयरधनीले मात्र आवेदन दिन सक्नेछन् । देवःको बिक्री प्रबन्धक एनआइबीएल क्यापिटल मार्केट्स लिमिटेड रहेको छ । हकप्रद सेयर आवदेनका लागि एनआइबीएल क्यापिटल मार्केट्स तथा देव विकास बैंकको केन्द्रीय कार्यालय लालदरबारसहित देवःको अधिकांश शाखा कार्यालयबाट आवेदन दिन सकिनेछ । यस्तै, नेपाल इन्भेष्टमेन्ट बैंकको पोखरा, बिराटनगर र वीगन्ज शाखा कार्यलय तथा गुडविल फाइनान्स लिमिटेडको नेपालगन्ज र इटहरी शाखा कार्यालयबाट पनि आवेदन दिन सकिनेछ ।
२१ पुस २०७३, ११।००
वि.सं.२०७३ पुस २१ बिहीवार १२:०२ मा प्रकाशित