काठमाडौ । आइतबार तीन वटा वित्तीय संस्थाको हकप्रद भर्ने अन्तिम दिन रहेको छ । एभरेष्ट बैंकको तीन बराबर एक, गुडविल फाइनान्सको १० बराबर छ र पूर्णिमा विकास बैंकको चार बराबर एकको अनुपातमा हकप्रद सेयर भर्ने आज अन्तिम दिन हो । जसअनुसार, आजको बैंकिङ समयभित्रमा दिइएका आवेदनले मात्रै मान्यता पाउनेछन् ।
एभरेष्ट बैंकले असार १८ गतेदेखि एक करोड ५० लाख ८८ हजार ८७ कित्ता सेयर बिक्री खुला गरेको थियो । असार ६ गतेसम्म कायम सेयरधनीले बैंकको बिक्री प्रबन्धक एनआइबीएल क्यापिटल मार्केट्स लजिम्पाट काठमाडौंबाट हकप्रदका लागि आवेदन दिन सकिनेछ । त्यसैगरी, एभरेष्ट बैंकको केन्द्रीय कार्यालय लाजिम्पाट काठमाडौं तथा यसका सम्पूर्ण शाखा कार्यालयबाट पनि आवेदन दिन सकिनेछ ।
गूडविल फाइनान्स लिमिटेडले पनि असार १८ देखि नै हकप्रद सेयर निष्काशन गरिरहेको छ । जसमा असार १ गतेसम्म कायम सेयरधनीले मात्रै आवेदन दिन पाउनेछन् । कम्पनीको सेयर निष्कासन तथा विक्री प्रबन्धक एनआईबीएल क्यापिटल मार्केट्स लिमिटेड रहेको छ । शेयरधनीले एनआइविएल क्यापिटल, गुडविल फाइनान्सका केन्द्रिय तथा शाखा कार्यालयहरु र नेपाल इन्भेष्टमेन्टका कार्यालयहरु वीरगञ्ज, विराटनगर, चिप्लेढुङगा, पोखरा, वुटवल र धनगढीबाट आवेदन दिन सक्ने फाइनान्सको धितोपत्र निष्काशन तथा बिक्री प्रवन्धक एनआर्इबिएल क्यापिटल मार्केटले जनाएको छ।
त्यसैगरी, पूर्णिमा विकास बैंकले असार १९ गतेदेखि निष्काशन गरेको हकप्रदमा जेठ १५ गतेसम्म कायम सेयरधनीले आवेदन दिन पाउनेछन् । बैंकको सेयर निष्कासन तथा विक्री प्रबन्धक सिद्धार्थ क्यापिटल लिमिटेड रहेको छ ।
लगानीकर्ताले सिद्धार्थ क्यापिटल लिमिटेड नारायणचौर नक्साल र सिद्धार्थ बैंकको देशभरिका शाखा कार्यालयबाट आवेदन दिन सकिनेछ । यसैगरी, पूर्णिमा विकास बैंकको भैरहवा, रुपन्देहीलगायत यसका सम्पूर्ण शाखा कार्यालयबाट पनि आवेदन फारम भर्न र बुझाउन सकिनेछ ।
प्रकाशित मितिः २०७४ साउन २२
वि.सं.२०७४ साउन २२ आइतवार १३:०२ मा प्रकाशित