काठमाडौ । एभरेष्ट इन्स्योरेन्सले बीमा समितिले तोकेको चुक्तापूँजी बढाउने क्रममा ६ सय प्रतिशत हकप्रद बिक्रीको प्रक्रिया अगाडि बढाएको छ । कम्पनीको गएको साधारणसभाले ६०० प्रतिशत हकप्रद बिक्री गर्ने प्रस्ताव पारित गरेको थियो ।
कम्पनीले हाल कायम रहेको चुक्ता पूँजी १२ करोड १५ लाखको (१ः६) को अनुपातमा हकप्रद शेयर निष्काशन गर्नेछ । जसका लागि कम्पनीले सिद्धार्थ क्यापिटल लिमिटेडलाई बिक्री प्रबन्धक नियुक्त गरेको छ ।
शेयर निष्काशन सम्बन्धी सम्झौतापत्रमा एभेरेष्ट इन्स्योरेन्स कम्पनी लिमिटेडका तर्फबाट प्रमुख कार्यकारी अधिकृत कमल गौतम र सिद्धार्थ क्यापिटल लिमिटेडका तर्फबाट प्रमुख कार्यकारी अधिकृत ध्रुव तिमिल्सिनाले बुधबार हस्ताक्षर गरेका हुन् ।
कम्पनीको ७२ करोड ९० लाख रुपैयाँ बराबरको ७२ लाख ९० हजार कित्ता हकप्रद शेयर बिक्रीपछि चुक्ता पूँजी ८५ करोड ५ लाख पुग्नेछ ।
बीमा समितिको निर्देशन अनुसार २०७५ असार मसान्तसम्ममा चुक्ता पूँजी एक अर्ब पुर्याउनु पर्नेछ ।
प्रकाशित मितिः २०७४ भदौ ७
वि.सं.२०७४ भदौ ७ बुधवार ११:४७ मा प्रकाशित
