काठमाण्डौं । नेपाल धितोपत्र बोर्डले हकप्रद सेयर निष्काशनका लागि एकै दिनमा ४ वटा कम्पनीहरुलाई स्वीकृति दिएको छ । ४ कम्पनीले कुल ३७ लाख ३२ हजार कित्ता हकप्रद निष्काशनको अनुमती पाएका हुन् ।
बोर्डले एउटा बीमा कम्पनी, २ वटा विकास बैंक र एउटा फाइनान्सलाई पछिल्लो पटक हकप्रद सेयर निष्काशनको अनुमती दिएको हो । हकप्रद सेयर निष्काशनको अनुमती पाउनेहरुमा कसमस डेभलपमेण्ट बैंकले १ बराबर १ अर्थात शतप्रतिशत, अल्पाइन डेभलपमेण्ट बैंकले ३ बराबर २ दशमलव ०८४ कित्ता, सुर्या लाइफ इन्स्योरेन्सले ४ बराबर १ अर्थात २५ प्रतिशत र युनाइटेड फाइनान्सले पनि ४ बराबर अर्थात २५ प्रतिशत हकप्रद निष्काशनको अनुमती पाएका हुन् ।
५ करोड ३ लाख १२ हजार रुपैंइा चुक्ता पूँजी रहेको कसमस डेभलपमेण्ट बैंकले चालु आर्थिक वर्षको ९ महिनाको अवधिमा ९३ लाख ३० हजार रुपैंया खुद नाफा कमाएको छ । बुधबार प्रतिकित्ता सेयर ६ सय १० रुपैंयामा किनबेच भएको कसमसको प्रतिसेयर आम्दानी २४ रुपैंया ७३ पैसा छ ।
त्यसै गरि ११ करोड ८० लाख रुपैंया चुक्ता पूँजी रहेको अल्पाइन डेभलपमेण्टले चैत मसान्तसम्ममा २ करोड ४१ लाख ३५ हजार रुपैंया खुद नाफा गरेको छ । बिहीबार प्रतिकित्ता सेयरको ६ सय २० रुपैंयामा कारोबार भएको बैंकको प्रतिशेयर आम्दानी २० रुपैंया ४२ पैसा छ ।
५० करोड रुपैंइा चुक्ता पूँजी रहेको सुर्या लाइफ इन्स्योरेन्स कम्पनीले गत चैत मसान्तसम्मा ७९ लाख ९ हजार रुपैंया खुद नाफा कमाएको छ । सुर्य लाइफको बिहीबार प्रतिकित्ता सेयर १ हजार २ सय ३० रुपैंयामा किनबेच भएको छ ।
बिहीबार ४ सय ८ रुपैंया प्रतिकित्ताका दरले सेयर कारोबार भएको युनाइटेड फाइनान्सले चैत मसान्तसम्ममा ७ करोड ४३ लाख रुपैंया खुद नाफा कमाएको छ । प्रतिसेयर आम्दानी २१ रुपैंया ३८ पैसा रहेको फाइनान्सको चुक्ता पूँजी ४६ करोड ३९ लाख ३५ हजार रुपैंया रहेको छ ।
१० असार २०७३, १०।००
वि.सं.२०७३ असार १० शुक्रवार १२:०७ मा प्रकाशित
