काठमाडौ । सहारा विकास बैंकले पूर्वघोषित २५० प्रतिशत हकप्रद सेयर अनिवार्यरुपमा निष्काशन गर्नुपर्ने भएको छ । पुँजी बजार नियामक नेपाल धितोपत्र बोर्डले कानुनलाई पालना गर्न निर्देशन दिएपछि प्रस्तावित हकप्रद सेयर खारेज गर्न बोलाइएको सहाराको विशेष साधारणसभा फेरि स्थगित भएको छ ।
यसअघि साधारण सभाबाट पारित हकप्रद निष्काशन गर्ने निर्णयलाई खारेज गर्न सहाराले असार ३१ गतेलाई विशेष साधारणसभा बोलाएको थियो । तर, साधारण सभाबाट पारित भइसकेको हकप्रद सेयर ल्याउने निर्णय खारेज गर्न नहुने भन्दै सेयरधनीले नेपाल धितोपत्र बोर्डमा उजुरी दिएकै कारण बोर्डले स्पष्टिकरण सोधेपछि सहाराले पूर्वघोषित विशेष साधारणसभा साउन ७ गते बस्ने गरी मिति सारेको थियो । बोर्डले साधारण सभाले पारित गरेको हकप्रद ल्याउनैपर्छ भनेपछि सहाराले अहिले फेरी विशेष साधारण सभा स्थागित गरिएको सूचना सार्वजनिक गरेको छ । यसमा अब विशेष साधारण सभा बस्ने कुनै पनि मिति खुलाइएको छैन ।
सहाराको २०७३ पुस २९ गते बसेको छैठौ वार्षिक साधारण सभाले पुँजी बृद्धिका लागि भन्दै २५० प्रतिशत (१ः२.५) हकप्रद सेयर जारी गर्ने निर्णय गरेको थियो । तर अहिले देवः विकास बैंकसँग एक्वायर हुने भएपछि २५० प्रतिशत हकप्रद ल्याउने साधारण सभाको निर्णयलाई खारेज गर्नकै लागि सहाराले विशेष साधारण सभा बोलाएको थियो ।
प्रकाशित मितिः २०७४ साउन ७
वि.सं.२०७४ साउन ७ शनिवार ०७:०० मा प्रकाशित
