धनकुटा । गए राति छिन्ताङ–८ स्थित सिम्लेडाँडामा पिकअप दुर्घटना हुँदा दुई जनाको मृत्यु भएको छ भने छ जना घाइते भएका छन् । धरानबाट मूलघाट हुँदै भोजपुरको सीमास्थित अखुवाटारतर्फ जाँदै गरेको को१ज २७२२ नंको पिकअप ब्रेक फेल भएर सडकबाट करिब ७० मि तल खस्दा उक्त दुर्घटना भएको हो ।
दुर्घटनामा परी भोजपुरको घोडेटारस्थित सगरमाथा माविका सहायक प्रअ पृथ्वीमान राई र धरान–१ सिखरटोलकी सुशीला श्रेष्ठको घटनास्थलमै मृत्यु भएको प्रहरीले जनाएको छ ।
दुर्घटनामा पिकअप चालक विकास राई, सहचालक हर्क माझी, छिन्ताङ–६का प्रेम भण्डारी, विकास दुलाल, शम्शेर राई र उनका छ वर्षीय छोरा घाइते भएको र उपचारका लागि धरानस्थित बिपी कोइराला स्वास्थ्य विज्ञान प्रतिष्ठान लगिएको जिल्ला ट्राफिक प्रहरी कार्यालयका प्रमुख सुरेन्द्र खड्काले जानकारी दिए ।
ट्र्याक्टरको ठक्करबाट १ को मृत्यु
महोत्तरी । महोत्तरी जिल्लाको सहोडवा गाविसमा ट्र्याक्टरले ठक्कर दिँदा सहोडवा गाविस–६ बस्ने ४० वर्षीया करुणादेवी झा को शुक्रबार मृत्यु भएको छ ।
शुक्रबार बेलुका सहोडवा–६ मा पैदल हिँडेर घरतिर आउँदै गरेकी झालाई ज१त ३१९४ नंको ट्र्याक्टरले ठक्कर दिएको र घाईतेको विराटनगरस्थित न्युरो अस्पतालमा उपचारका क्रममा मृत्यु भएको जिप्रका महोत्तरीका प्रहरी उपरीक्षक जनक भट्टराईले जानकारी दिए ।
ट्र्याक्टर चालक फरार छन् भने ट्र्याक्टर जिप्रका, महोत्तरीको नियन्त्रणमा रहेको प्रहरीले जनाएको छ ।
प्रकाशित मितिः २०७३ कार्तिक १३
वि.सं.२०७३ कात्तिक १३ शनिवार १४:५१ मा प्रकाशित
