विश्व फुटबलको प्रशासकीय निकाय फिफाले सन् २०१४ को विश्वकप फुटबल खेल्ने रुसी खेलाडीको अतिरिक्त डोपिङ परीक्षण गरिएको फिफाका पूर्व अधिकारीले बताएका छन् । फिफाको चिकित्सा विभागका पूर्व प्रमुख जिरी डिभोराकले विश्वकप पूर्व रुसी खेलाडीले प्रतिबन्धित शक्तिवर्धक औषधि प्रयोग गरे नगरेको बारेमा अतिरिक्त परीक्षण गरिएको र त्यसमा रुसी खेलाडी दोषी नपाइएको डिभोराकको भनाई छ । परीक्षण सहि रहेको र रुसी खेलाडी डोपिङमा दोषी नभेटिएको डिभोराकले बताए ।
तर फिफाका अध्यक्ष जियानी इन्फान्टिनोले भने रुसका खेलाडीले सरकारी सहयोगमा नै प्रतिबन्धित शक्तिवर्धक औषधि प्रयोग गरेको भन्ने आरोपका सम्बन्धमा अनुसन्धान भइरहेको बताएका छन् । फुटबलसहित कम्तिमा ३० खेलका खेलाडीले रुसी सरकारको सहयोगमा प्रतिबन्धित शक्तिवर्धक औषधि प्रयोग गरेको प्रतिवेदन यसअघि नै सार्वजनिक भएको छ ।
सन् २०११ देखि २०१५ सम्ममा संकलन गरिएको एक हजार खेलाडीको नमुनाको परीक्षणको क्रममा यस्तो देखिएको म्याकलरेन प्रतिवेदनमा दाबी गरिएको छ । सन् २०१४ को विश्वकप फुटबलमा सहभागी भएको रुसी टिमका खेलाडी पनि यसमा सहभागी रहेको आरोप लागेको छ ।
फिफाले भने कुनै पनि खेलाडी डोपिङ परीक्षणमा असफल नभएको जनाएको छ । तर अहिले पनि आफूहरुले यस विषयमा अनुसन्धान गरिहेको फिफाको भनाई छ । रुसमा आउँदो वर्ष विश्वकप फुटबल हुँदैछ । अहिले त्यहाँ कनफेडेरेशन कप फुटबल भइरहेको छ ।
प्रकाशित मितिः २०७४ असार १८
वि.सं.२०७४ असार १८ आइतवार १५:०३ मा प्रकाशित
