काठमाडौ । सप्तकोशी डेभलपमेन्ट बैंकको १३० प्रतिशत हकप्रद भर्ने आज (शुक्रबार) अन्तिम दिन हो । यसआधारमा आज कार्यालय समयसम्म मात्र यो हकप्रदमा आवेदन दिन सकिनेछ । बैंकले बाढीका कारण देशभरको जनजीवन अस्तव्यस्त भएको भन्दै हकप्रद भर्ने अन्तिम म्याद भदौ १ बाट ९ गते सारेको हो ।
सप्तकोशीले १ः१.३ अनुपातमा (प्रत्येक १ कित्ता सेयर थप १.३ कित्ता) १०० रुपैयाँ अंकित मूल्यको २७ लाख ४३ हजार कित्ता हकप्रद सेयर बिक्री खुला गरेको हो । यसमा असार १३ गतेसम्म कायम रहेका सेयरधनीले मात्र आवेदन दिन सक्नेछन् । लगानीकर्ताले सप्तकोशी डेभलपमेन्ट बैंकको मुख्य कार्यालय विराटनगर तथा यसका अधिकांश शाखा कार्यालय र एनएमबी क्यापिटल लिमिटेड नागपोखरी काठमाडौबाट आवेदन दिन सक्नेछन् ।
एनएमबि बैंकको देशैभरीका अधिकांश शाखा कार्यालयबाट पनि यो हकप्रदमा आवेदन दिन सकिने छ । एनएमबी क्यापिटलबाट भने चेकमात्र बुझ्ने व्यवस्था गरिएको छ । सप्तकोशीको बिक्री प्रबन्धकमा एनएमबी क्यापिटल हो ।
प्रकाशित मितिः २०७४ भदौ ९
वि.सं.२०७४ भदौ ९ शुक्रवार ११:२८ मा प्रकाशित