काठमाण्डौं । नेपाल स्टक एक्सचेञ्जमा पाँच कम्पनीले एक करोड ६७ लाख ९६ हजार एक सय ६४ कित्ता हकप्रद तथा बोनस सेयर सुचिकृत गरेका छन् ।
मंगलबार नेप्सेमा प्राइम कमर्शियल बैंकको सबैभन्दा धेरै अर्थात एक करोड २३ लाख ५० हजार आठ सय ७४ कित्ता हकप्रद सेयर सुचिकृत भएको छ । बैंकले केही समय अघि ३३ दशलमव ३३ प्रतिशत हकप्रद निष्काशन गरेको थियो । बैंकले हकप्रद सहितको पूँजीमा फेरी १७ दशमलव २५ प्रतिशत बोनसका लागि सेयरधनी पुस्तिका बन्द गरि साधारण सभा गरि सकेको छ । यो सेयर पनि केही दिनमा नै सुचिकृत हुनेछ ।
सुर्या लाइफ इन्स्योरेन्सको १२ लाख ५० हजार कित्ता हकप्रद सेयर पनि मंगलबार नै नेप्सेमा कारोबारका लागि सुचिकृत भएको छ । इन्स्योरेन्सले केही समय अघि २५ प्रतिशत हकप्रद निष्काशन गरेको थियो । कम्पनीले गत आर्थिक वर्षको कमाईबाट दिने लाभांस घोषणा गरिसकेको छैन ।
सिन्धु विकास बैंकले मंगलबार नै नेप्सेमा १२ लाख नौ हजार तीन सय ७५ कित्ता हकप्रद तथा दुई लाख तीन हजार एक सय ७५ कित्ता बोनस सेयर सुचिकृत गरेको छ । बैंकले केही समय अघि ८० प्रतिशत हकप्रद निष्काशन गरी १७ प्रतिशत बोनस बितरण गरेको थियो ।
लक्ष्मी लघुवित्तले नेप्सेमा ११ लाख कित्ता हकप्रद सेयर कारोबारका लागि सुचिकृत गराएको छ । उसले एक बराबर एकको अनुपातमा हकप्रद सेयर निष्काशन गरेको थियो । गत आर्थिक वर्षको कमाईबाट लघुवित्तले लगानीकर्तालाई बोनस नदिई हकप्रदले समेत पाउने गरी १० प्रतिशत नगद लाभांस मात्र बितरण गरेको थियो ।
तिनाउ डेभलपमेण्ट बैंकले पनि मंगलबार नै नेप्सेमा छ लाख ८२ हजार सात सय ४० कित्ता बोनस सेयर सुचिकृत गराएको छ । बैंकले गत आर्थिक वर्षको कमाईबाट लगानीकर्तालाई २५ प्रतिशत बोनस बितरण गरेको थियो ।
१८ माघ २०७३, ३।४५
वि.सं.२०७३ माघ १८ मंगलवार १५:३५ मा प्रकाशित
