काठमाडौ । मेगा बैङ्कले हकप्रदमा अवितरित रहेको संस्थापक र साधारण सेयर गरी १८ लाख ४० हजार ७३९ दशमलव ६३ कित्ता शेयर केही दिनभित्रमा लिलामी सूचना प्रकाशमा ल्याउने भएको छ । एक सय वा सोभन्दा बढी अंकित मूल्यमा बैंकको सेयर विक्री प्रबन्धक नबिल इन्भेष्टमेन्ट बैंकिङ्ग मार्फत लिलाम बढाबढमा विक्रीमा ल्याउनेछ ।
साथै यसअघि निष्काशन भएको बैंकको ६५ प्रतिशत हकप्रद सेयरको बाँडफाँड भएको छ । बैंक सञ्चालक समितिको मंसिर २८ गते सम्पन्न बैठकले रितिपुर्वक आवेदन दिने एक लाख ४८ हजार ८७४ आवेदकहरुलाई दुई करोड ७९ लाख ४४ हजार २९५ कित्ता हकप्रद सेयर बाँडफाँड गरेको बैंकले जनाएको छ ।
हकप्रदपछि मेगाको चुक्ता पूँजी ७ अर्ब ५६ करोड पुगेको छ । टुरिजम डेभलपमेण्ट बैंकसँग मर्जर प्रकृयामा रहेको मेगा बैंकको चुक्ता पूँजी मर्जरपछि साढे ९ अर्ब रुपैयाँ पुग्नेछ ।
बैंकले १०ः६.५ को अनुपातमा एक सय रुपैयाँ अंकित दरको २ करोड ९७ लाख ८५ हजार ३४ दशमलव ६३ कित्ता हकप्रद सेयर भदौ २७ देखि कात्तिक १४ गतेसम्म जारी गरेको थियो । आफ्नो हकभन्दा धेरै सेयरको माग गरी आवेदन दिने सेयरधनीहरुलाई आफ्नो हकभन्दा बढी आवेदन भएको रकम संकलन केन्द्रबाटै फिर्ता भुक्तानी गर्ने बैंकले जनाएको छ ।
२०७४ पुष १४ गते प्रकाशित
वि.सं.२०७४ पुस १४ शुक्रवार १४:४३ मा प्रकाशित