काठमाडौ। नेपालमा विमान ल्याएको झण्डै ४ महिनापछि मात्रै नेपाल नागरिक उड्डयन प्राधिकरणले श्री एयरलाइन्सलाई उडान अनुमति (एओसी) दिएको छ । श्री एयरलाइन्सका अनुसार प्राधिकरणले बिहिबार अनुमति प्रदान गरेको हो । तीनवटा जहाज ल्याइसकेको श्री एयरलाइन्सले आज शुक्रबारदेखि नियमित उडान थाल्ने श्री एयरलाइन्सका बजार प्रवन्धक अनिल मानन्धरले जानकारी दिए ।
एयरलाईन्सले भैरहवा र नेपालगञ्जको उडान थाल्ने जनाएको छ । चार महिना अघिदेखि उडान थाल्न खोजेको भएपनि प्राधिकरणले एओसी दिनमा गरेको ढिलाइका कारण ४ महिनासम्म यसले उडान भर्न सकेको थिएन ।
श्री एयरलाइन्सले पहिलो विमान गत चैतमा नै ल्याइसकेको थियो । यसले तीन महिनामा क्यानेडाको बम्बार्डियरबाट उत्पादित सिआरजे सिरिजका तीनवटा जेट इन्जिनयुक्त विमान भित्राएको थियो ।
तीन महिना बित्दासम्म पनि पनि क्यानले कुनै निर्णय नदिएपछि श्रीको फाइल अख्तियार दुरुपयोग अनुसन्धानले तानेको थियो । अख्तियारले छानबिन गर्न थालेपछि मात्रै प्राधिकरणले एओसीको प्रक्रिया थालेको थियो ।
एओसी जारी गर्नुभन्दा पहिले उडान परिक्षण गर्ने अनुमति पनि क्यानले केहि दिनअघि मात्रै दिएको थियो । आठ वटा हेलिकप्टर रहेको श्री एयरलाइन्सले हेलिकप्टर सेवापनि प्रदान गर्दै आएको छ ।फाईल फोटो
प्रकाशित मितिः २०७४ साउन २७
वि.सं.२०७४ साउन २७ शुक्रवार १०:४१ मा प्रकाशित
