काठमाण्डौं । स्वर्गीय नायक श्रीकृष्ण श्रेष्ठ जन्मेको जिल्ला सिन्धुपाल्चोक पुगेर नायिका स्वेता खड्काले बस्ती निर्माणमा सहयोग गर्ने वचन दिएकी छिन् । हिजो शनिबार केहि पत्रकारको साथमा स्वेता भूकम्पबाट प्रभावित भएको सिन्धुपाल्चोकको ठूलो सिरुवारीस्थिती झ्याँडी गाउँमा सहयोगका लागि पुगेकी थिइन् ।
शनिबार माझी बस्तीको अवलोकन गर्दै स्वेताले आफूले बस्ती निर्माणका लागि ज्यान दिएर सहयोग गर्ने बताइन् । भूकम्पले माझी बस्तीलाई ठूलो असर गरेपनि अझै पनि यो बस्ती उठ्न सकेको छैन । उनले कार्यक्रममा भनिन्, ‘यो बस्तीलाई नमुना बस्ती बनाउन म आफ्नो ज्यान दिएर लाग्नेछु । सरकारले गर्ने आर्थिक सहयोगमा हामीले व्यवस्थापन गरेर नमुना बस्ती बनाउँनेछौ ।’
स्वेता उक्त बस्ती पुग्दा उनलाई ‘भाउजु, बुहारी’ भनेर भव्य स्वागत गरिएको थियो । स्वेताले भनिन्, ‘म हजुरहरुकै भाउजु, बुहारी हुँ । मलाई यो शब्दले सम्बोधन गर्दा कुनै आपत्ती छैन ।’ उनले पहिलो पटक यो बस्ती पुगेको बताइन् । स्वेतालाई माझी बस्तीसम्म पुर्याउने सहयोग गर्ने यज्ञराज कार्कीले बर्खा सुरु हुनु भन्दा अगाडि नै बस्ती निर्माणको काम सुरु हुने बताएका छन् ।
१ फागुन २०७३, अनलाईनखबर, ११।००
वि.सं.२०७३ फागुन १ आइतवार १२:१२ मा प्रकाशित
