मोरङ । जिल्लाको पथरी शनिश्चरे नगरपालिकास्थित जिरिखिम्तीका किसानहरु बगरकै खेतीबाट आफ्नो जीविकोपार्जन गरिरहेका छन् । सागसब्जीमध्ये अर्गानिक मानिने सिमे सागको खेतीबाट एक सिजनमा १० हजारदेखि ४ लाख रुपैयाँसम्म आम्दानी हुने कृषकको भनाइ छ ।
पानीमै उम्रने सिमे सागको खेतीले उनीहरुको जीवन चलिरहेको छ । स्थानीय मोरङ्गी खोलाको बगरमा सिमे सागको खेती गरी स्थानीयवासीले मनग्गे आम्दानी गरिरहेका छन् । सिमे साग रोपेको एक महिना नपुग्दै बिक्रीका लागि तयार हुन्छ । जिरिखिम्तीका करिव ४० घर परिवारले मोरङ्गी खोलाको १० विघा क्षेत्रफलमा सिमे साग लगाउँदै आएका छन् ।
बर्षा मौसम सकिएपछि खोलाको बगरमा लगाउने सिमे साग यस क्षेत्रका मानिसको आम्दानीको मूख्य श्रोत हो । धरान, बिराटनगर, दमक र काँकडभिट्टासम्मको बजारमा साग बेचेर घर धान्ने गरेको स्थानीय तुलसा गुरुङले बताइन् ।
सिमे सागको बजार राम्रो भएकाले व्यापारीहरु सिमे साग खेती भएको स्थानमै साग किन्न आउने गरेको गुरुङको भनाइ छ । सिमसार क्षेत्रमा उनीहरूले हरेक वर्ष नगदे बालीका रुपमा सिमे सागको खेती गर्दै आइरहेका छन् ।
७ माघ २०७३, अनलाईनखबर, २।००
वि.सं.२०७३ माघ ७ शुक्रवार १५:०९ मा प्रकाशित