काठमाण्डौँ । महानगरपालिकाले पाँच बर्षभित्र उपत्यकाका नगरका सबै सडक उज्यालो बनाउने भएको छ । सौर्य सडक बत्ती कार्यक्रमको लागतमध्ये ५० प्रतिशत सरकार, १५ प्रतिशत उपभोक्ता (संस्थागत सहभागिता भएमा ३० प्रतिशत) र बाँकी महानगरले व्योहोर्ने गरी सुरु भएको यो परियोजनामा स्थानीयको सहभागिता बढ्दै गएपछि यस्तो हुन लागेको हो ।
विभागका अनुसार १५ हजार रुपैयाँ उठाएर निवेदनका साथ आए १ लाख बराबरको बत्ती पाइने हुँदा सर्वसाधारणले उत्साह देखाएका हुन्।
अघिल्लो आर्थिक बर्षमा सुरु भएको जनसहभागितामा आधारित सौर्य सडक बत्ती कार्यक्रम अन्तर्गत महानगरपालिका मुख्य सडकमा दुई हजारवटा बत्ती जडान गरिएको थियो। यो बर्ष उक्त संख्यालाई पाँच हजार पुर्याउने जनाइएको छ।
आउँदो पाँच बर्षभित्र महानगर अन्तर्गतका सबै सडकमा उज्यालो पुर्याउन ५० देखि ६० हजार वटा सौर्यबत्ती जडान गर्नुपर्ने शहरी पुर्वाधार विकास विभागले जनाएको छ। शहरलाइ रातमा पनि जीवन्त, सुरक्षित, सुन्दरता कायम राख्न यो कार्यक्रम ल्याएको महानगरले जनाएको छ।
९ फागुन २०७३, बिजमाण्डु, १।००
वि.सं.२०७३ फागुन ९ सोमवार १४:१२ मा प्रकाशित
