विराटनगर । दशै तिहार र छैठ लगायतका नजिकिदै गरेका चाडपर्वलाई लक्षित गरेर यहाँ स्थित दुग्ध वितरण आयोजनाले दुध, दही र पनिर लगायतका दुग्धजन्य पदार्थको उत्पादन बृद्धि गर्ने र विशेष छुट दिने जनाएको छ ।
चाडपर्वको बेला दुग्धजन्य पदार्थको माग सामन्य बेलाको भन्दा दोब्बर बढी हुने भएकाले ती बस्तुहरुको अहिले नै उत्पादन बढाएर भण्डारण गर्न लागिएको हो । सामन्य अवस्थामा दैनिक दुई सय किलो माग रहेको पनिरको चाडपर्वको समयमा दैनिक पाँच सय किलो सम्म माग हुने बताइएकोछ ।
सामन्य अवस्थामा दैनिक तीनदेखि चार हजार लिटर खपत हुने दुध र दहीको माग चाडपर्वमा बढेर प्रति दिन आठ हजार लिटर तथा घिउ दैनिक डेढ सय किलोबाट बढेर पाँच सय किलो सम्म पुग्ने गर्छ ।
नजिकिदै गरेका पर्वहरुलाई मध्यनजर गरेर आयोजनाले घिउमा प्रतिलिटर रु १० र पनिरमा प्रतिकिलो रु पाँच छुट दिएको छ । आयोजनाको काउण्टरबाट खरिद गर्ने उपभोक्तालाई मात्र उक्त छुट दिएको आयोजनाले जनाएको छ ।
११ असोज २०७३, २।००
वि.सं.२०७३ असोज ११ मंगलवार १४:१७ मा प्रकाशित