काठमाडौ । स्टान्डर्ड चार्टर्ड बैंकको एफपीओ बाँडफाँट भएको छ । बैंकको एफपीओमा १४० कित्तासम्म आवेदन दिनेलाई गोलाप्रथाबाट सेयर बाँडफाँट गरिएको छ ।
यस आधारमा गोलाप्रथामा सेयर पाउनेको हातमा १० कित्ता परेको छ भने चिठा नपर्नेको चाहिँ हात खाली भएको छ । १५० कित्तादेखि माथि आवेदन दिने सबैले सेयर पाएका छन् । १५० कित्ताका लागि आवेदन दिनेको भागमा पनि १० कित्ता नै सेयर परेको छ ।
यसैगरी १६० कित्ता आवेदन दिनेले ११ कित्ता सेयर हात पारेका छन् । एवं तरिकाले धेरै आवेदन दिनेले क्रमशः बढी सेयर पाएका हुन् । सबैभन्दा बढी २५ हजार ५ सय ८० कित्ता आवेदन दिनेको भागमा १६३० कित्ता सेयर परेको छ ।
प्रतिशतका आधारमा हेर्दा १० देखि ३० कित्तासम्म आवेदन दिनेले २४.६० प्रतिशत सेयर पाएका छन् भने त्यसभन्दा माथि ४० देखि २५ हजार ५८० कित्तासम्म आवेदन दिनेको भागमा ६.३८ प्रतिशत सेयर परेको छ । यो सेयरमा कुल २ लाख १७ हजार ३२२ जनाले सेयर भरेका थिए । जसमा १ लाख ४० हजार १३२ जनाले सेयर पाएका छन् ।
यसअघि शुक्रबार बाँडफाँट गर्ने अन्तिम तयारी भइरहँदा बिक्री प्रबन्धकले आस्वाको डाटा भेरिफिकेसनमा समस्या भएको भन्दै रोकेको थियो । ठूलोमात्रामा आवेदकलाई रद्द गर्नुपर्ने भएकाले शुक्रबार बाँडफाँट हुन नसकेको बिक्री प्रबन्धक एनएमबि क्यापिटलले दाबी गर्दै आएको छ ।
धितोपत्र बोर्डले शुक्रबारभित्र बाँडफाँट गरिसक्न अन्तिम समयसिमा दिएको थियो । बाँडफाँट तोकिएको समय नगरेको भन्दै बोर्डले बिक्री प्रबन्धकसँग स्पष्टीकरणसमेत मागेको थियो । चार्टर्डको एफपीओ बाँडफाँट भएपछि बजारमा तरलता सहज हुनुका साथै लगानीकर्तालाई समेत फाइदा पुग्ने विश्वास लिईएको छ । चार्टर्डको एफपीओमा २ लाख २५ हजार भन्दा बढीले ३८ अर्ब २० करोड ९४ लाख ९३ हजार ५४० रुपैयाँ बराबरको आवेदन दिएका छन् । बैंकले चैत १ देखि ४ गते सम्म २५ लाख ५८ हजार १४० कित्ता एफपीओको बिक्री खुला गरेको थियो ।
प्रकाशित मितिः २०७४ बैशाख २६
वि.सं.२०७४ वैशाख २६ मंगलवार ११:४० मा प्रकाशित