काठमाडौ । आइतबार सेयर बजार २२.३४ अंकले बढेर १४६५.६२ अंकमा पुगेको छ । आइृतबार क वर्गका परिसूचकहरुको मापन गर्ने सेन्सेटीभ इन्डेक्स पनि ५.०८ अंकले बढेको छ । यसदिन फाइनान्स र उत्पादनमूलक बाहेक बाँकी कारोबार भएका सबै समूह बढेपछि समग्र बजार नै हरियो रंगले पोतिएको छ ।
आइतबार सबैभन्दा धेरै होटल समूह ३५.६४ अंकले बढेको छ भने बैंकिङ समूह २९.३४ अंकले बढेको छ । त्यस्तै, बीमा समूह २७.६७ अंकले बढ्दा जलविद्युत् २६.१ र विकास बैंक २३.२१ अंकले बढेको छ भने अन्य समूह ७.५२ अंकले बढेको छ । फाइनान्स र उत्पादनमूलक समूह क्रमशः ०.४७ र ३९.८६ अंकले घटेका छन् ।
बजार बढेपनि कारोबार रकम भने बढ्न सकेको छैन । आइतबार ५७ करोडको मात्रै कारोबार भएको छ । दिनभरिमा १३४ वटा कम्पनीको १० लाख आठ हजार चार सय छ कित्ता सेयर चार हजार तीन सय २३ पटक खरिदविक्री हुँदा कुल ५७ करोड ३३ लाख ५० हजार रुपैयाँको कारोबार भउको छ ।
कुल कारोबारमध्ये नेपाल दुरसञ्चार कम्पनीको नौ करोड ४२ लाख रुपैयाँको कारोबार भएको छ भने नेपाल लाइफ इन्स्योरेन्सको दुई करोड ८५ लाख रुपैयाँको कारोबार भएको छ । एभरेष्ट बैंकको पनि दुई करोड ८० लाख रुपैयाँभन्दा माथिको सेयर कारोबार भएको छ । लाइफ इन्स्योरेन्स कर्पोरेसन नेपालको दुई करोड २७ लाखको कारोबार हुँदा बैंक अफ काठमाण्डू लुम्बिनीको एक करोड ८५ लाख रुपैयाँको कारोबार भएको छ । देवः विकास बैंक, सिद्धार्थ बैंक, युनिलिभर नेपाल, नेपाल बंगलादेश बैंक, कुमारी बैंक लगायतको पनि एक करोडमाथिको कारोबार भएको छ ।
प्रकाशित मितिः २०७३ पुस १७
वि.सं.२०७३ पुस १७ आइतवार १६:४८ मा प्रकाशित
