काठमाण्डौं । भारतमा चिनीको उत्पादन घटेर मूल्य बढ्न थालेपछि त्यसलाई रोक्न सरकारले निर्यात शुल्क बृद्धि गर्ने भएको छ । यसको असर नेपाली बजारमा पनि देखिने छ ।
नेपालले औपचारिक माध्यमबाट १४ करोडको चिनी आयात गरेपनि अनौपचारिक माध्यमबाट अझ वढि आयात हुने गरेको छ ।
भारतका खाद्य मन्त्री राम विसाल पासवानले चिनीको निर्यात शुल्क २५ प्रतिशतले बृद्धि गरिने जानकारी दिएका छन् । ‘अन्तर्राष्ट्रिय बजारमा चिनीको भाउ वढेको छ । यस्तो बेलामा आयातकर्ताहरुले मुनाफा सुरक्षित गर्न स्टक बढाउँदा राम्रो’ उनले ट्विट गरेरै भनेका छन् ।
पासवानले उत्पादन कम भएका बेला चिनीको निर्यात भएर अभाव अझ खड्किने भन्दै त्यसमा २५ प्रतिशत अतिरिक्त शुल्क लगाइने जानकारी दिए । उनले शुल्क बढेपछि निर्यात निरुत्साहित भएर बजारमा आवश्यक चिनी उपलब्ध हुने दावीसमेत गरे ।
इन्डियन सुगर मिल्स एसोसिएसनका अनुसार, देशमा चिनीको उत्पादन २५० लाख टन मात्र हुने छ । यो अघिल्लो बर्षको तुलनामा ११.७ प्रतिशतले कम हो ।
अन्तर्राष्ट्रिय बजारमा समेत चिनीको भाउ १२ प्रतिशतले उक्लिसकेको छ । इन्टरनेशनल सुगर अर्गनाइजेसनले यो बर्ष सन्सार भरी ५० लाख टन चिनी अभाव हुने प्रक्षेपण गरेको छ । नेपालमा पनि यसपाली चिनीको उत्पादन घट्ने छ । किसानलाई पैसा नतिरेका कारण उखुको उत्पादन घटेको छ ।
२८ जेठ २०७३, १.००, बिजमाण्डु
वि.सं.२०७३ जेठ २८ शुक्रवार १३:२२ मा प्रकाशित