काठमाण्डौं । यो वर्ष चिनी उत्पादन ३० प्रतिशतले घट्ने भएको छ । गत वर्षको तुलनामा ऊखु उत्पादनमै कमि आएपछि चिनी उत्पादन घट्ने निश्चित भएको छ ।
यो बर्ष ऊखु उत्पादनमा धेरै कमि आएपछि चिनी उत्पादन घट्ने भएको हो । नेपालमा गत वर्ष १ लाख ४० हजार मेट्रिक टन चिनी उत्पादन भएको थियो । यो वर्ष सोको तुलनामा ३० प्रतिशतभन्दा बढीले कमि आउने उद्योगीहरुको भनाइ छ ।
उद्योगीहरुले भर्खरै मात्र ऊखु क्रसिङ शुरु गरेका छन् । ऊखु क्रसिङको तीन सजिन हुने र यो अन्तिम सिजन भएकाले पनि चिनी उत्पादनमा उच्च गिरावट आउँछ । गत वर्षको तुलनामा चिनी उत्पादन ३० प्रतिशते घटेमा यो वर्ष १ लाख मेट्रिक टनमात्र चिनी उत्पादन हुने छ ।
किसानसँग महङ्गोमा ऊखु खरिद गर्नुपरेकाले यो वर्ष उद्योगीहरुले चिनीको मूल्य समेत बढाउने भएका छन् । भर्खर चिनी उत्पादन शुरु भएको र बजारमा चिनी पठाउँदासम्म प्रति किलोग्राम मूल्य ५ रुपैयाँसम्म बढ्ने भएको छ ।
सरकारले यो वर्ष ऊखुको मूल्य प्रति क्वीन्टल ५ सय ३१ रुपैयाँ मूल्य निर्धारण गरेको छ । यो मूल्य गत वर्षको तुलनामा प्रति क्वीण्टल ७९ रुपैयाँले बढी हो । गत वर्ष ऊखुको मूल्य प्रति क्वीण्टल ४ सय ५२ रुपैयाँ मात्र थियो ।
११ माघ २०७३, ११।००
वि.सं.२०७३ माघ ११ मंगलवार १२:४० मा प्रकाशित
