लमजुङ । लमजुङमा निर्माण हुने ४९.६ मेगावाटको सुपर दोर्दी जलविद्युत आयोजनाको विद्युतगृह निर्माण गर्न ठेकेदार छनोट गरिएको छ । विद्युतगृह र पेनस्टक पाइप निर्माण गर्न हाइ हिमालय हाइड्रो कन्सट्रक्सन कम्पनीलाई दिइएको हो ।
भूमिगत विद्युतगृह अन्तर्गत भर्टिकल साफ्ट, टेल रेस सुरुङ (विद्युतगृहबाट पानी निकास गर्ने सुरुङ) को काम हाइ हिमालयले गर्नेछ । करिब १ अर्ब रुपैयाँमा निर्माण पूरा गर्ने गरी ठेक्का सम्झौता भएको कम्पनीका अध्यक्ष किरण मल्लले बताए ।
सिभिल निर्माण गर्न बाँकी ठेक्का बैशाखभित्र पूरा हुने पिपुल्स हाइड्रो पावर कम्पनीका सञ्चालक गणेश कार्कीले बताए । ‘इलेक्ट्रो मेकानिकल कामको लागि ठेक्का प्रक्रिया अघि बढेको छ, केही समयभित्रै ठेकेदार छनोट हुन्छ,’ उनले भने ।
निर्माण सुरु भएको २७ महिनामा निर्माण पूरा गर्ने आयोजनाको विद्युत मर्स्याङ्दी करिडोरमा जोड्ने गरी कनेक्सन एग्रिमेन्ट (प्रसारण लाइन सम्झौता) भएको छ । उक्त समयभित्र नेपाल विद्युत प्राधिकरणले लाइन निर्माण गर्नुपर्ने कार्कीले बताए ।
प्रकाशित मितिः २०७४ बैशाख २१
वि.सं.२०७४ वैशाख २१ बिहीवार १५:२६ मा प्रकाशित