काठमाण्डौं । के तपाईले सिनर्जी पावर कम्पनीको सेयर किन्नुभएको थियो ? थियो भने के तपाई ७१ हजार ४ सय ८९ जना भित्र पर्नुभयो ? हिजो बाँडफाँड गरिएको सिनर्जीको आइपिओ अनुसार ७१ हजार ४८९ जना लगानीकर्ता सिनर्जीपावरको सेयरधनी बनेका छन् ।
कम्पनीको बिक्री प्रवबन्धक सानिमा क्यापिटलका अनुसार साना लगानीकर्ताले ७ लाख ७२ हजार ८ सय कित्ता तथा ठुला लगानीकर्ताले ११ लाख ५८ हजार ६ सय कित्ता सेयर हात पारेका छन् ।
साथै कम्पनीको सेयर नपरेको पैसा धितोपत्र बाँडफाँड नियमावली अनुसार फागुन १० गतेदेखि बितरण गर्ने सूचना आएको छ । कम्पनीको सेयर बिक्री प्रबन्धक सानिमा क्यापिटलले सोही व्यवस्था अनुसार सेयर नपरेका लगानीकर्तालाई सेयर नपरेको पैसा फिर्ता गर्नेछ ।
पुस ८ गते देखि १२ सम्म आइपीओ निष्काशन गरेको कम्पनीले एक सय रूपैयाँ अंकित दरमा २१ करोड रुपैयाँ बराबरको २१ लाख कित्ता सेयर बेचेको थियो । जस मध्ये ६३ हजार कित्ता सेयर कर्मचारीलाई र एक लाख ५ हजार कित्ता सेयर म्युचुअल फण्डका लागि बाँडफाँड भैसकेको छ ।
सिनर्जीको आएपीओमा ३१० कित्ता अर्थात ३१ हजार रुपैयाँ सम्मको आवेदन दिने लगानीकर्तालाई गोलाप्रथाबाट दश कित्ताका दरले सेयर वितरण गरिएको हो । त्यसभन्दा माथि ३२ हजारदेखि ५० हजारसम्म आवेदन गर्ने साना लगानीकर्तालाई ३।०४ प्रतिशत र पचास हजार भन्दा बढी आवेदन गर्नेलाई २।९३ प्रतिशतका दरले बाँडफाँट गरिएको बिक्री प्रबन्धक सानिमा क्यापिटलले जनाएको छ ।
६ फागुन २०७३, १२।००
वि.सं.२०७३ फागुन ६ शुक्रवार ११:३६ मा प्रकाशित
