काठमाडौ । बहुप्रतिक्षित निर्माणाधीन ४५६ मेगावट क्षमताको माथिल्लो तामाकोसी जलविद्युत आयोजनाले यसै आर्थिकबर्ष भित्र आयोजना प्रभावित तथा सर्वसाधारणको लागि आइपिओ जारी गर्ने भएको छ। आयोजना प्रभावित दोलखावासीका लागि आईपिओ निष्काशनको अनुमति लिन दशैँ अगाडि धितोपत्र वोर्डमा आवेदन गर्ने कम्पनीले जनाएको छ ।
कम्पनीका अनुसार परियोजनाले दोलखाबासीलाई १० प्रतिशतले हुन आउने १ अर्ब ५ करोड ९० लाख रूपैयाँ बराबरको १ करोड ५ लाख ९० हजार कित्ता सेयर र सर्वसाधारणलाई १५ प्रतिशतले हुन आउने १ अर्ब ५८ करोड ८५ लाख रुपैयाँ बराबरको १ करोड ५८ लाख ८५ हजार कित्ता सेयर निश्काशन गर्न लागेको हो । आयोजनाका अनुसार प्रभावित स्थानीयवासीलाई पुष मसान्तसम्ममा र चैत मसान्तसम्ममा अन्य सर्वसाधारणहरूको लागि सेयर जारी गर्ने तयारी गरिदै छ ।
आयोजनाले अतिप्रभावित, कम प्रभावित र प्रभावित गरी तीन वर्गमा विभाजन गरी सेयर वितरण गर्ने तयारी गरेको छ । स्थानीयवासीले कम्तीमा ३० देखि बढीमा ३०० सय कित्तासम्म साधारण सेयर पाउनसक्ने अनुमान गरिएको छ ।
परियोजनाले करीव ९१ प्रतिशत काम सम्पन्न गरिसककेको जानकारी दिएको छ । अहिले विद्युतगृह, बाँध र सुरूङ, प्रसारणलाइनलगायतका संरचना निर्माण भइरहेकोे छ । तामाकोसीमा कर्मचारी संचय कोष, नेपाल विद्युत प्राधिकरण, राष्ट्रिय बीमा संस्थान र नागरिक लगानी कोषको लगान छ ।
यसअघि कर्मचारी संचय कोषका संचयकर्ता, ऋण दिने संस्थाका कर्मचारी र नेपाल विद्युत प्राधिकरणका कर्मचारीलाई गरी १७.२८ प्रतिशत अर्थात १ अर्ब ८२ करोड ९९ लाख ५२ हजार रुपैयाँ बराबरको १ करोड ८२ लाख ९५ हजार कित्ता सेयर निश्कासन भैसकेको छ ।
प्रकाशित मितिः २०७४ भदौ २४
वि.सं.२०७४ भदौ २४ शनिवार १६:०९ मा प्रकाशित
