काठमाडौ । अप्पर तामाकोसी हाइड्रोपावर कम्पनीले आगामी साउनमा स्थानीयका लागि छुट्ट्याइएको सेयर निष्कासन गर्ने भएको छ । दोलखामा निर्माणाधीन ४ सय ५६ मेगावाटको माथिल्लो तामाकोसी जलविद्युत आयोजनाले स्थानीयका लागि १० प्रतिशत सेयर जारी गर्न लागेको हो । आर्थिक वर्ष २०७४/७५ को सुरुमै सेयर जारी गर्ने कम्पनीका प्रमुख कार्यकारी अधिकृत विज्ञानप्रसाद श्रेष्ठले बताए ।
‘चालु आवभित्र स्थानीय र सर्वसाधारणका छुट्ट्याएको सेयर निष्कासन गर्ने योजना थियो,’ उनले भने, ‘स्थानीय तहको निर्वाचनले ढिला हुन् भयो । अर्को आवको सुरुमै सेयर जारी गरिनेछ ।’ कम्पनीका अनुसार आयोजना प्रभावित स्थानीयका लागि जारी पुँजीको १० प्रतिशत अर्थात १ अर्ब ५ करोड ९० लाख रुपैयाँबराबरको १ करोड ५ लाख ९० हजार कित्ता जारी हुनेछ ।
स्थानीयको सेयर निष्कासन र बाँडफाँटपछि सर्वसाधारणका लागि छुट्याइएको १५ प्रतिशत अर्थात १ अर्ब ५८ करोड ८५ लाख रुपैयाँबराबरको १ करोड ५८ लाख ८५ हजार कित्ता निष्कासन हुने कम्पनीले जनाएको छ ।
कर्मचारी सञ्चय कोषमा रकम जम्मा गर्ने सञ्चयकर्ता नेपाल विद्युत प्राधिकरणका कर्मचारी, आयोजनामा ऋण लगानी गर्ने संस्थाका कर्मचारीका लागि सेयर जारी भइसकेको छ ।उर्जाखबरबाट
प्रकाशित मितिः २०७४ जेठ ४
वि.सं.२०७४ जेठ ४ बिहीवार १२:१६ मा प्रकाशित
