काठमाण्डौं । खोजमूलक पत्रकारहरुको संस्था इन्टरनेसनल कन्सोर्टियम अफ इन्भेस्टिगेटिभ जर्नलिस्टस (आइसिआइजे)ले विश्वका धनी र प्रख्यात नेताहरुले पर्दा पछाडि रहेर गरेको आर्थिक लगानीको खुलासा गर्दै ‘पानामा पेपर्स’ सार्वजनिक गरेको छ ।
१ करोडभन्दा बढी कागजातहरुबाट विश्वभरका सयभन्दा बढी समाचार संस्थाहरुको सहकार्यमा एक वर्षसम्मको अनुसन्धानपछि यो खुलासा गरिएको हो। यसमा रहेका २ लाख १४ हजार अफसोर कम्पनीका र त्यससँग सम्बन्धित विश्वका २०० देशका १४० नेता र सार्वजनिक पदाधिकारीहरुसित जोडिएको छ।
लिक भएका डकुमेन्टमा ५० भन्दा बढी देशका १४० नेताहरुको नाम जोडिएको छ। यसमा राष्ट्रप्रमुख, उनीहरुका सहयोगी, मन्त्रीहरु र निर्वाचित पदाधिकारीसमेत पर्छन्। यसमा १२८ नेता र सार्वजनिक पदाधिकारीहरुले गरेका गोप्य आर्थिक कारोबारको विस्तृत विवरणसमेत छ।
रुसी राष्ट्रपति भ्लादिमिर पुटिनका सहयोगीहरु, पाकिस्तान र आइसल्यान्डका प्रधानमन्त्री, साउदी अरबका राजा, अजरबैजानका राष्ट्रपतिका सन्तानको नियन्त्रणमा रहेको कम्पनीहरुको खुलासा फाइलहरुले गरेका छन्।
त्यस्तै, भ्रष्टाचारविरुद्ध अभियान छेड्ने चिनियाँ नेता सि जिनपिङ, भ्रष्टाचारविरुद्ध सुधार अभियान चलाएको भन्ने युक्रेनी राष्ट्रपति पेट्रो पोरोसेन्को, ट्याक्स हेभन रिफर्म गर्ने बेलायती प्रधानमन्त्री डेभिड क्यामरुनका स्वर्गीय पिताका अवैध लगानीहरुका बारेमा पनि यसले खुलासा गरेकोछ ।
२२ चैत २०७२, ८।००
वि.सं.२०७२ चैत २२ सोमवार ११:३० मा प्रकाशित
