काठमाण्डौं । २१ वर्षअघि इटालियन नागरिकको हत्या गरी फरार भएका टासी गुरुङलाई प्रहरीले पक्रेको छ। २०५२ असोज २७ गते काठमाडौं ठमेलको रेगी पबमा इटालियन नागरिक क्यारारो डेभिडको कुटपिट तथा छुरी प्रहारबाट हत्या गरेका गुरुङलाई प्रहरीको केन्द्रीय अनुसन्धान ब्युरो सिआइबीले केही दिनअघि पक्राउ गरेको हो।
मनाङ जिल्ला मनाङ गाविस नावल गाउँ घर भएका टासी र उनका साथीहरुले इटालियन नागरिक डेभिड क्यारारो र उनका दुई महिला साथीहरु एन्टेनोला केसराइनी एवं लारा स्किबिना ठमेलको रेगी पवमा बसिरहेका बेला ती महिलाहरुमाथि आपत्तिजनक ब्यबहार गरेका थिए । त्यही विवादमा टासी र उनका साथीहरुले कुटपीट र छुरी प्रहार गरेर क्यारारोलाई सख्त घाइते बनाएपछि उनलाई वीर अस्पतालमा उपचारका लागि पु¥याउँदा डाक्टरहरुले मृत्यु भइसकेको घोषणा गरेका थिए।
घटनाको करिव डेढ बर्षसम्म नेपाल र भारतमा लुगेकर बसेका टासी पछि निजको बाबु कालु मनाङ्गे भन्ने तेन्जिङ गुरुङले अमेरिका जानलाई गोरखाका सण्डुप घलेको नामको भिसा लागेको २९६१५५० नम्बरको पासपोर्ट चार लाख पचास हजारमा खरिद गरी फोटो परिवर्तन गरी टासीलाई अमेरिका पठाएका थिए। टासीले अमेरिकामा पासपोर्ट हराएको भनेर नयाँ पासपोर्ट लिएका थिए।
उनी काठमाण्डौं आएका बेला होल कन्ट्रीयार्डबाट पक्राउ परेका हुन् ।
२२ चैत २०७२, ८.००
वि.सं.२०७२ चैत २२ सोमवार १०:५२ मा प्रकाशित
