काठमाडौ । स्थानीय तहको निर्वाचन हुने दिन बैशाख ३१ गते पर्यटकहरुलाई आवतजावत गर्न सहज बनाउने मुख्य उद्देश्यका साथ नेपाल पर्यटन बोर्डले हरियो प्लेटका सवारीलाई पास वितरण गरेको छ । सो दिन सम्पूर्ण सवारीसाधन बन्द हुने हुँदा विदेशबाट आएका पर्यटकलाई अप्ठेरो नहुन् भन्ने उद्देश्ले पास वितरण गरिएको बोर्डको भनाइ छ ।
नेपाल पर्यटन बोर्डले अहिले विदेशबाट आउने पर्यटक र नेपालबाट स्वदेश उड्नुपर्ने पर्यटकलाई विमानस्थलदेखि होटेल र होटेलदेखि विमानस्थलसम्म पुर्याउने गरी होटेल तथा ट्राभल कम्पनीका सवारीलाई सिफारिसपत्र वितरण गरेको हो । सोही सिफारिसका आधारमा ती कम्पनीले जिल्ला प्रशासन कार्यालयबाट सवारीसाधन सञ्चालन अनुमति पास प्राप्त गर्ने बताइएको छ ।
३१ गते नेपाल आउने र यहाँबाट स्वदेश फिर्ता हुने कुनै पनि पर्यटकले सास्ती भोग्नु नपर्ने गरी पासको व्यवस्था मिलाएको नेपाल पर्यटन बोर्डका सञ्चार प्रमुख शरद प्रधानले बताए । प्रधानका अनुसार ‘त्यस दिन काठमाडौं उपत्यकाभित्र र आसपासका क्षेत्रमा साइटसिइङका प्याकेजहरू भने सञ्चालन हुने छैनन् ।’
प्रकाशित मितिः २०७४ बैशाख २७
वि.सं.२०७४ वैशाख २७ बुधवार १६:४१ मा प्रकाशित
