काठमाडौ । युनाइटेड मोदी हाइड्रोपावरको आइपीओ बिहीबार बाँडफाँड भएको छ । हाइड्रोपावरमा लगानीकर्ताले न्यूनतम १० कित्तादेखि अधिकतम ३३७ कित्तासम्म सेयर हात पारेका छन् । ३३० कित्तासम्म आवेदन दिनेलाई गोलाप्रथाबाट सेयर बाँडिएको हो । मोदीको सेयर एनआइबीएल क्यापिटल लिमिटेडको कार्यालय लैनचौरमा बिहान ९ बजे बाँडफाँड गरिएको हो ।
३४० कित्ताभन्दा माथि आवेदन दिने सबैले सेयर पाएका छन् । यो सेयरमा न्यूनतम ५० कित्तादेखि अधिकतम १५ हजार कित्तासम्म आवेदन दिन पाइने व्यवस्था गरिएको थियो । यो सेयरमा ९७ हजार १५५ जनाले आवेदन दिएकोमा ६५ हजार ५०८ जनाले सेयर पाएका छन् । जसमा ६५ हजार ४५४ जना सर्वसाधारण, ७ वटा सामूहिक लगानि कोष, ४७ जना कर्मचारीले सेयर पाएका छन् ।
यो सेयरमा साना लगानीकर्ताको हातमा २.८ प्रतिशत र ठूला लगानीकर्ताले २.२४ प्रतिशत सेयर पाएका छन् ।
युनाइटेड मोदीको गत फागुन १९ देखि २३ गतेसम्म १७ लाख २५ हजार कित्ता आइपीओ बिक्री खुला गरिएको थियो । १०० अंकित रुपैयाँ मूल्यको यो आइपीओमा कम्पनीले ३४ हजार ५०० कित्ता सेयर कर्मचारीको लागि छुट्याएको थियो भने ८६ हजार २५० कित्ता सेयर सामूहिक लगानी कोष कम्पनीहरुलाई दिएको छ । यसमा बिक्री प्रबन्धकको काम एनआइबीएल क्यापिटले गरेको हो ।
वि.सं.२०७३ चैत ३१ बिहीवार १०:२८ मा प्रकाशित