युनाईटेड फाइनान्सले भारतको मुत्तूट फाइनान्सलाई २१ लाख कित्ता संस्थापक एफपीओ बेच्ने प्रस्ताव राखेको छ । युनाईटेड फाइनान्सले आगामी साधारण सभामा २० प्रतिशत हकप्रद खारेज गरि २१ लाख संस्थापक एफपीओ रणनितिक साझेदार मुत्तूट फाइनान्सलाई विक्री गर्ने प्रस्ताव गरेको हो ।
कम्पनीले पुस २९ गते शनिबार विहान ११ बजे अम्रपाली बैंकेट भाटभटेनीमा २३ औं बार्षिक साधारण सभा आह्वान गरेको हो । साधारण सभाले चुक्ता पूँजी ६७ करोड २७ लाखको १९ प्रतिशत बराबरको १२ करोड ७८ लाख १३ हजार ९७० रुपैयाँको बोनस पारित गर्न लागेको हो । साधारण सभाका लागि पुस १४ गतेदेखि बुकक्लोज गर्ने भएकाले पुस १३ गतेसम्म कायम सेयरधनीले मात्र बोनस पाउनेछन् ।
नियामक निकायको निर्देशन अनुरुप फाइनान्सको प्रबन्धपत्र तथा नियमावलीमा आवश्यक सबै संसोधनहरु गर्न सञ्चालक समितिलाई अख्तियारी प्रदान गर्ने तथा जीवन तथा निर्जीवन बीमा कम्पनीको एजेण्ट भई कार्य गर्ने, सम्बन्धित निकायको स्वकृति लिई धितोपत्र दलाल तथा निक्षेप सदस्य भई कार्य गर्ने व्यवस्था थप गर्ने मुख्य प्रस्ताव रहेका छन् ।
युनाईटेडले २२ औं साधारण सभा बाट पारित भएको २० प्रतिशत हकप्रद र १९ प्रतिशत बोनसबाट नै राष्ट्र बैंकले तोकेको चुक्ता पूँजी ८० करोड रुपैयाँ कायम हुने भएपछि खारेज गर्न लागिएको जनाएको छ ।
त्यस्तै भारतको मुत्तूट फाइनान्सलाई रणनितिक साझेदारको रुपमा भित्र्याउन प्रिमियम सहित १९० रुपैयाँका दरले २१ लाख कित्ता संस्थापक समूहको थप सेयर जारी गर्न आवश्यक कार्य गर्न सञ्चालक समितिलाई अख्तियारी प्रदान गर्ने प्रस्ताव रहेको छ ।
सभामा सर्वसाधारण सेयरधनीको तर्फबाट प्रतिनिधित्व गर्ने सञ्चालकलाई एक कार्यकाल निरन्तरता प्रदान गर्ने र लेखापरिक्षक नियुक्ति लगायतका प्रस्ताव समेत समावेश रहेका छन् ।
वि.सं.२०७४ पुस ९ आइतवार ०९:५४ मा प्रकाशित
