काठमाडौ । वेष्टर्न डेभलपमेन्ट बैंक र नमस्ते फाइनान्स बीच एकीकृत कारोबार सुरु भएको साढे दुई महिना बित्दा समेत सेयर कारोबार सुरु हुन सकेको छैन । सेयर कारोबार नखुल्दा दुबै कम्पनीका सेयरधनी आफ्नो सम्पत्ती खरिद विक्री गर्नबाट बञ्चित बन्न पुगेका छन् ।
धितोपत्र बोर्डले गरेको व्यवस्था अनुसार एकीकृत कारोबार सुरु गरेको १५ दिनभित्र सेयर कारोबार सुचारु गर्नुपर्ने हुन्छ । तर सबैजसो कम्पनीहरुले यसलाई निकै हल्का किसिमले मात्र लिने गरेको छन् जसले सेयरधनीको लगानी लामो समय बन्देज पर्ने गरेको छ । एकीकृत कारोबारको लामो समयसम्म सेयर खुला नगर्ने वेष्टन एउटा मात्र कम्पनी हैन अन्य थुप्रै कम्पनीले लामो समयसम्म सेयर कारोबार खुला गर्ने गरेका छैन ।
एक बराबर एक स्वाप रिसियोमा मर्जर सम्झौतापछि वेष्टर्न डेभलपमेन्ट बैंक र नमस्ते फाइनान्सको सेयर कारोबार २०७३ चैत २५ गतेदेखि रोक्का रहेको छ । यसबिचमा राष्ट्र बैंकले भदौ २८ गते एकीकृत कारोबार गर्न अनुमति प्रदान गरेपछि असोज २९ गतेदेखि एकीकृत कारोबार सुरु गरेका थिए ।
प्राय सबैजसो कम्पनीका पदाधिकारीहरुले एकीकृत कारोबार सुरु गर्दा समयसिमा भित्रै कारोबार सुरु गर्ने प्रतिबद्धता व्यक्त गर्ने गरेपनि त्यो प्रतिबद्धतामा नै सीमित हुने गरेको छ । एकाध कम्पनी बाहेक अहिलेसम्म कुनैपनि कम्पनीले तोकिएको समयमा सेयर कारोबार खुला गरेका छैनन् ।
मर्जपछि वेष्टर्नको चुक्ता पूँजी ४२ करोड ९३ लाख रुपैयाँ पुगेको छ । राष्ट्र बैंकेले तोकेको न्यूनतम चुक्ता पूँजी कायम गर्न बैंकले गत आर्थिक बर्षको नाफाबाट ७ करोड रुपैयाँको बोनस वितरण गर्नुपर्ने देखिन्छ ।
२०७४ पुष ११ गते प्रकाशित
वि.सं.२०७४ पुस ११ मंगलवार १५:४० मा प्रकाशित