काठमाण्डौं । वेष्टर्न डेभलपमेन्ट बैंकले एक बराबर एक कित्ता अनुपातको हकप्रद सेयर भर्ने थपेको १५ दिनको समयसिमा पनि बुधबार सकिँदैछ । यसअघि बैंकले मंसिर २२ गतेदेखि निष्काशन गरेको हकप्रद भर्ने समय पुस २६ गतेसम्म राखेर सूचना प्रकाशित गरेको थियो ।
हकप्रद कात्तिक १ गतेसम्म कायम रहेका सेयरधनीले भर्न पाउनेछन् । बैंकले एक सय रूपैयाँ अंकित दरको १५ लाख ६९ हजार ६ सय कित्ता हकप्रद सेयर बिक्री खुला गरेको हो । दाङको घोराहिमा प्रधान कार्यालय रहेको बैंकको चुक्ता पुँजी १५ करोड ६९ लाख ६० हजार रुपैयाँ रहेको छ । हकप्रद पश्चात बैंकको चुक्ता पूँजी ३१ करोड ४० लाख रुपैंया पुग्नेछ ।
सेयरधनीले हकप्रद सेयरमा आवदेन गर्न बिक्री प्रबन्धक प्रभु क्यापिटल,कमलादी,वेष्टर्न डेभलपमेन्ट बैंकका सम्पुर्ण शाखा कार्यालयहरु, सिद्धार्थ डेभलपमेन्ट बैंकको वीरगन्ज, विराटनगर, नारायणगढ, पोखरा, बुटवल र धनगढी शाखा कार्यालयहरुबाट समेत बुधबार कार्यालय समयभित्र हकप्रद आवेदन फारम लिन र बुझाउन सक्नेछन् ।
बैंकले असोज मसान्तसम्ममा २९ लाख ५८ हजार रुपैयाँ खुद नाफा कमाएको छ । बैंकको जगेडा कोषमा ६ करोड ७६ लाख ५६ हजार रुपैंयाँ सञ्चित रहेको छ ।
१२ माघ २०७३, ११।००
वि.सं.२०७३ माघ १२ बुधवार ११:५५ मा प्रकाशित