काठमाडौं । ट्राफिक प्रहरीले काठमाडौं उपत्यकामा जथाभावी बाटो काट्ने पैदलयात्रुबाट एक सातामा १८ लाखभन्दा रुपैयाँ जरिवाना असुल गरेको छ । उपत्यकाका तीन जिल्लाबाट कारबाहीमा परेका १६ हजार नौ सय ८६ मध्ये नौ हजार दुई सय ४१ जनाबाट १८ लाख ४८ हजार दुई सय राजस्व संकलन भएको ट्राफिक प्रहरीले जनाएको छ । र, बाँकी सात हजार सात सय ४५ जनाले जरिवाना नतिरेकाले प्रहरी नियन्त्रणमा राखी सडक सुरक्षासम्बन्धी कक्षा लिएपछि छाडिने गरेको महाशाखाका डिआइजी मिङमार लामाले बताए ।
नियम उल्लंघन ह्वात्तै घट्यो
महाशाखाका अनुसार नयाँ नियम लागू भएको सातौँ दिनमा जथाभावी बाटो काट्ने क्रम आधा घटेको छ । नियम लागू भएको सात दिनको अवधिमा १६ हजार नौ सय ८६ जना कारबाहीमा परेको महानगरीय ट्राफिक प्रहरी महाशाखाले जनाएको छ ।
पहिलो दिन ३३ सय ४८, दोस्रो दिन ३५ सय ९२, तेस्रो दिन २९ सय ५४, चौथो दिन २२ सय २३, पाँचौँ दिन एक हजार १४, छैटौँ दिन २३ सय ३० र सातौँ दिन १५ सय २५ जना नियम उल्लंघन गर्ने पैदलयात्रु कारबाहीमा परेको महाशाखाले जनाएको छ । पैदलयात्रुको लापरबाहीले हुने सडक दुर्घटना न्यूनीकरणका लागि पैदलयात्रु सुरक्षा अभियानको नियम लागू गरेको डिआइजी मिङमार लामाले बताए ।
काठमाडौंमा बढी उल्लंघन
ट्राफिक प्रहरी महाशाखाले सबैभन्दा बढी काठमाडौंमा पैदलयात्रु कारबाहीमा परेको जनाएको छ । यस अवधिमा काठमाडौंमा १३ हजार चार सय ५३, ललितपुरमा २३ सय ३३ र भक्तपुरमा १२ सयजना कारबाहीमा परेका छन् । नियम कार्यान्वयनमा कडाइ गरेपछि आमनागरिकमा सचेतना बढ्दै गएको ट्राफिक प्रहरीको भनाइ छ ।
पैदलयात्रुमा धेरै लापरबाही
उपत्यकामा पैदलयात्रुको लापरबाहीका कारण सडक दुर्घटना बढी हुने गरेकाले यस्तो नियम लागू गरिएको ट्राफिक प्रहरीले जनाएको छ । पैदलयात्रुको लापरबाहीका कारण उपत्यकामा ४२ प्रतिशत सडक दुर्घटनामा मृत्यु हुने गरेको ट्राफिक प्रहरीको भनाइ छ । नियम उल्लंघन गर्ने पैदलयात्रु कसैलाई नछाड्ने निर्देशन दिएको डिआइजी लामाले बताए । उनका अनुसार उपत्यकामा जेब्राक्रसिङ र आकाशेपुल भएको ठाउँमा नियम मिच्ने पैदलयात्रुलाई कारबाही गरिएको छ ।
आकाशेपुल र जेब्राक्रसिङ नभएको ठाउँमा पैदलयात्रुलाई सम्झाएर विनाकारबाही छाड्ने गरेको उनले बताए । उपत्यकामा २१ ठाउँमा मात्रै जेब्राक्रसिङ र २२ वटा आकाशेपुल रहेको ट्राफिक प्रहरीले जनाएको छ । उपत्यकालाई हर्न निषेधित क्षेत्र बनाउन सफल भएपछि पैदलयात्रु सुरक्षा अभियान सुरु गरेको महानगरीय ट्राफिक प्रहरी महाशाखाले जनाएको छ । नयाँ पत्रिका दैनिकबाट
प्रकाशित मितिः २०७४ जेठ २३
वि.सं.२०७४ जेठ २३ मंगलवार १२:०३ मा प्रकाशित
