पाल्पा । चापाकोटका ५२ वर्षीय लीलबहादुर चुनारालाई अहिले ठेको बनाउन भ्याइनभ्याई छ । विगत २५ वर्षदेखि ठेको बनाएर उनले जीविका चलाउँदै आएका छन्।
“एउटा कटहरको रुखबाट चार लाख ५० हजार रुपैयाँसम्म आम्दानी हुन्छ,” उनले भने। कटहरको रुखबाट ठेको बनाएर उनले मासिक २० हजारदेखि ३० हजार रुपैयाँसम्म आम्दानी गर्दै आएका छन्। गाउँघरमा परम्परागत रुपमा प्रयोग हुने दुग्धजन्य पदार्थ राख्न प्रयोग हुने ठेको, ठेकी, माने, आरी, गौवालगायत सामग्री उनले बनाउँदै आएका छन्।
“बाउबाजेले गरेको पेसालाई निरन्तरता दिँदै आएको छु”, उनले भने। चुनाराले चलाएको व्यवसायमा छ जनालाई रोजगारी मिलेको छ । ठेको दुई हजारदेखि आठ हजारसम्म बिक्री हुने गरेको छ । एक वर्षमा ३०० भन्दा बढी ठेको बिक्री गर्ने गरेको उनले बताए।
ठेको समूहमा मिलेर निर्माण गर्ने गरिन्छ । रत्नपुर, दामाचौर, गेझा, हुँगीलगायतका स्थानमा कटहरको बोट खरिद गरी वर्षौंदेखि यही व्यवसायलाई निरन्तरता दिँदैआएको चुनारा बताउँछन्।
निर्माण गरिएका सामग्री पाल्पा, स्याङ्जा, तनहुँ र नवलपरासीका विभिन्न स्थानमा बिक्री गरिँदै आएको बताइन्छ ।
२६ कार्तिक २०७३, ३।००
वि.सं.२०७३ कात्तिक २६ शुक्रवार १५:२७ मा प्रकाशित
