नेपाल विद्युत प्राधिकरण पोखरा क्षेत्रीय कार्यालयले चालु आर्थिक वर्षको ९ महिना (चैतसम्म) मा विद्युत बिक्री गरेर करिब २ अर्ब रुपैयाँ संकलन गरेको छ । कार्यालयले १९ करोड ९१ लाख ५० हजार ३ सय ५१ युनिट विद्युत बिक्री गरी उक्त रकम संकलन गरेको हो । रकम संकलन अहिलेसम्म ९७.५ प्रतिशत पुगेको क्षेत्रीय प्रमुख रामजी भण्डारीले बताए ।
‘महशुल संकलनमा कडाइ गरेकाले अहिलेसम्म करिब शतप्रतिशत नै रकम उठेको छ,’ उनले भने, ‘यो कार्यालयले महशुल संकलनमा चालु आवको लक्ष्य सजिलै पूरा गर्छ । बक्यौता रहेका ठाउँमा पनि निरन्तर ताकेता गरिएको छ ।’
देशका धेरै ठाउँमा विद्युत महसुल संकलनमा समस्या देखिएको छ । प्राधिकरणले महसुल नतिरेर पटक–लाइन काट्दै आएको छ । प्राधिकरणका अनुसार अहिले देशभर करिब ७ अर्ब रुपैयाँ महशुल बक्यौता छ ।
गण्डकी र धवलागिरि अञ्चलका १० जिल्ला समेट्ने क्षेत्रीय कार्यालयअन्तर्गत २ लाख ५६ हजार ४ सय ग्राहक छन् । कार्यालयका अनुसार यस क्षेत्रमा ६ सय ६३ किलोमिटर ३३ केभी, ३ हजार ३ सय ८५ किलोमिटर ११ केभी र ९ हजार २७ किलोमिटर ०।४ केभी प्रसारण लाइन विस्तार गरिएको छ ।
कार्यालयअन्तर्गत हालसम्म २ हजार ५ सय ८९ वटा वितरण ट्रान्सफर्मर जडित छन् । यस क्षेत्रमा ७५ सामुदायिक संस्थामार्फत ८१ हजार ५ सय ८६ ग्राहकमा विद्युत वितरण गरिएको छ । यस्तै, कार्यालयअन्तर्गत ८ आयोजना सञ्चालनमा छन् ।उर्जाखबरबाट
प्रकाशित मितिः २०७४ जेठ २६
वि.सं.२०७४ जेठ २६ शुक्रवार १५:३१ मा प्रकाशित
