काठमाडौ। सेयर बजारका अधिकाँश परिसूचक ओरालो लागेपछि सोमबार नेप्से परिसूचक ९.४१ अंकले घटेर १६१२.९१ अंकमा झरेको छ । यसदिन क बर्गका कम्पनीहरुको कारोबार मापन गर्ने सेन्सेटिभ इन्डेक्स २.३९ अंकले घटेर ३३८.३५ अंकमा झरेको छ।
सोमबार १५९ कम्पनीका १५ लाख ५६ हजार २६८ कित्ता शेयर ९१ करोड ७४ लाख रुपैयाँमा खरिद बिक्री भयो। अघिल्लो दिन आइतबार २७ लाख २६ हजार कित्ता शेयर ८१ करोड ५१ लाख रुपैयाँमा खरिद बिक्री भएको थियो। सोमबार अघिल्लो दिनको तुलनामा करिब नौ करोड रुपैयाँ बढीको कारोबार भएको हो।
समूहगत परिसूचकमा विकास बैंक र उत्पादन बाहेक बाँकी सबै परिसूचक ओरालो लागेको छ ।
सोमबार सबैभन्दा बढी स्वर्गद्वारी लघुवित्त विकास बैंकको शेयर खरिद बिक्री भयो। बैंकको ६ करोड ६३ लाख रुपैयाँको शेयर किनबेच भएको छ।
सोमबार सबैभन्दा बढी स्वरोजगार लघुवित्त विकास बैंकका शेयरधनीले करिब १० प्रतिशत कमाएका छन्। करिब १० प्रतिशत नै कमाउने कम्पनीको सूचिमा हिमालयन डिस्टिलरी र हिमालयन पावर पार्टनर रहेका छन्।
सोमबार १० प्रतिशतकै हाराहारीमा गुमाउनेमा तीन कम्पनी परेका छन् । सिद्धार्थ स्किम ग्रोथ १, नबिल ब्यालेन्स फण्ड १ र जनरल फाइनान्सले करिब १० प्रतिशत नै गुमाएका हुन्।
प्रकाशित मितिः २०७४ भदौ १२
वि.सं.२०७४ भदौ १२ सोमवार १६:११ मा प्रकाशित