काठमाडौं । सिद्धार्थ इन्सुरेन्सको २० प्रतिशत बोनस सेयर सुरक्षित गर्ने मंगलबार (आज) अन्तिम हो । सिद्धार्थले बुधबारदेखि साधारण सभा हुने दिनसम्म बुक क्लोज गर्दैछ ।
बुक क्लोज हुनुभन्दा अघि कायम सेयरधनीले मात्र लाभांश पाउने हुँदा मंगलबार नै सेयर किनिसक्नुपर्नेछ । पुराना सेयरधनी भने स्वतः लाभांशको हकदार हुनेछन् । इन्सुरेन्सले कात्तिक २९ मा गर्ने साधारण सभामा गत वर्षको कमाईबाट २० प्रतिशत बोनस र १.०५३ प्रतिशत (कर प्रयोजनको लागि) लाभांश दिने प्रस्ताव पेस गर्दैछ ।
साधारण सभा नेपाल पर्यटन बोर्डको सभाकक्ष, भृकुटीमण्डप काठमाडौंमा बिहान ११ बजे सुरु हुनेछ । सभामा कम्पनीले प्रस्तावित बोनस सेयर वितरणपछि कायम हुने चुक्ता पुँजीबाट ३५ प्रतिशत हकप्रद निष्कासन गर्ने प्रस्ताव पनि पेस गर्नेछ । कम्पनीले निर्जीवन बिमा कम्पनीलाई तोकिएको न्यूनतम १ अर्ब रुपैयाँ चुक्ता पुँजी पुर्याउन बोनस र हकप्रदको बाटो समाएको हो ।
प्रकाशित मितिः २०७४ कार्तिक १४
वि.सं.२०७४ कात्तिक १४ मंगलवार १२:४६ मा प्रकाशित