काठमाडौं। लामो समय हकप्रदको हल्लाले दोस्रो शेयर बजारमा धेरै कारोबार हुँदै आएको अपि पावरले गत आर्थिक वर्षको नाफाबाट ८ प्रतिशत बोनस शेयर दिने भएको छ। अपि पावरले आकर्षक बोनस शेयर तथा हकप्रदको प्रस्ताव सहित चौथौं वार्षिक साधारणसभा डाकेको छ।
पुष ३० गते डाकेको साधारणसभाबाट कम्पनीले एक बराबर दुर्इको अनुपातमा हकप्रद शेयर निष्कासन गर्ने प्रस्ताव पारित गर्ने भएको छ। कम्पनीले साधारणसभा प्रयोजनकालागि पुष २१ देखि ३० गतेसम्म बुक क्लोज गर्ने जानकारी दिएको छ। बुक क्लोज अगाडि कायम भएका शेयरधनीमात्र बोनस शेयर प्राप्त गर्न सक्ने जानकारी दिइएको छ।
हकप्रद जारीपछि चुक्ता पूँजी दुर्इ अर्ब २६ करोड पुग्ने कम्पनीले जनाएको छ। उक्त पूँजीबाट एक अर्ब रुपैयाँ सिद्धकाली पावर लिमिटेडमा लगानी गर्ने जनाएको छ। साथै बाँकी एक अर्ब २६ करोड रुपैयाँ १८ मेघावाट क्षमताको विभिन्न सोलार आयोजनामा लगानी गर्ने जनाइएको छ।
कम्पनीले गत आर्थिक वर्षमा ७ करोड ४० लाख रुपैयाँ नाफा गरेको थियो। साथै कम्पनीको चुक्ता पूँजी एक अर्ब पाँच करोड रुपैयाँ छ।
वि.सं.२०७४ पुस ९ आइतवार ११:२० मा प्रकाशित