विराटनगर । प्रदेश नं १ का मुख्यमन्त्री शेरधन राई र नेपालका लागि स्विटजरल्याण्डका राजदुत तथा विदेशीदातृ निकायका प्रतिनिधिबीच छलफल भएको छ । शुक्रबार मुख्यमन्त्री तथा मन्त्रिपरिषदको कार्यालयमा भएको छलफलमा नेपालका लागि स्विटजरल्याण्डका राजदुत एलिजावेथ भानक्यापलर, डिएफआइडीका नेपाल प्रमुख रुरिक मार्सदेन र विश्व बैंकका प्रतिनिधि जर्ज लार्बीको सहभागिता थियो ।
छलफलका क्रममा उक्त टोलीले प्रदेश सरकारका प्राथमिकता, सहयोगको क्षेत्र, समस्या र चुनौतीको बारेमा जिज्ञासा राखेको थियो ।
छलफलका क्रममा मुख्यमन्त्री राईले प्रदेश सरकारले अगाडि सारेका योजना, काम लगायतका बारेमा बताउनु भएको थियो । उहाँले प्रदेश सरकारले कानुन निर्माणलाई तिब्रता दिएको र आवद्यिक योजना निर्माणलाई प्राथमिकता दिएको जानकारी दिनुभयो ।
संविधानमा उल्लेख भएको अधिकार प्रदेश सरकारले प्रयोग गर्दे अगाडि बढिरहेको मुख्यमन्त्री राईले बताउनुभयो । छलफलका क्रममा मुख्यमन्त्री राईले प्रदेश १ को विशेषता, सम्भावनाका बारेमा अवगत गराउनु भएको थियो । राजुदुत क्यापलरले नेपालले हासिल गरेको उपलब्धी संसारका लागि उदाहरणीय भएको बताउनुभयो । छलफलबाट प्रदेशको भूमिका बुझ्न राम्रो अवसर मिलेको उहाँको भनाई थियो ।
विश्व बैंकका प्रतिनिधि लारर्बीले प्रदेश सरकारसँग सहकार्य गर्न आतुर रहेको बताउनुभयो ।
संघीय सरकारको ्अनुमतिमा अहिले हामी सबै प्रदेश सरकारसँग छलफल गरिरहेका छौं, उहाँले भन्नुभयो प्रशासनिक र संरचनागत हिसाबले हामी सहयोग गर्छाै । हामी लामो समय देखी एकात्मक संरचनामा रहेको व्यवस्थामा काम गर्याे, डिएफआइीका नेपाल प्रमुख मार्सदेनले भन्नुभयो नेपाल नयाँ संरचनामा गए सँगै प्रदेश र स्थानीय तहसँग कसरी सहयोग गर्न सकिन्छ भन्नेबारे छलफलमा छौं । प्रदेश सरकारका प्राथमिकता तथा समस्या हेरेर काम गर्न सकिने उहाँको भनाई थियो ।
छलफल संघीयता कार्यान्वयनका लागि नेपाल सरकार र दातृ निकायले संयुक्त रुपमा शुरुवात गरेको क्षमता विश्लेषणमा केन्द्रित थियो । यो टोलीले यसअघि पाँच वटा प्रदेशमा यस्तै छलफल गरिसकेको छ ।
२०७५ मंसिर ७ गते प्रकाशित
वि.सं.२०७५ मंसिर ७ शुक्रवार १५:२५ मा प्रकाशित