बागलुङ । बागलुङको काठेखोला गाउँपालिकाले कार्यालयको जग्गा व्यवस्थापनको लागि १ करोड रुपैयाँ विनियोजित गरेको छ । गाउँपालिकाको पाँचौ गाउँसभाले आर्थिक वर्ष २०७६/०७७ मा कार्यालयको जग्गा व्यवस्थापन गर्नको लागि १ करोड रुपैयाँ विनियोजित गरेको हो ।
आफ्नै भवन नभएका कारण काठेखोला गाउँपालिका वडा नम्बर ६ मा घर भाडामा ल्याएर कार्यालय संचालन गर्दै आएको गाउँपालिकाले जग्गा व्यवस्थापनको लागि गाउँपालिका अध्यक्ष अमर थापाको अध्यक्षतामा ५ सदस्य जग्गा व्यवस्थापन समिति गठन गरि जग्गाको खोजी गरिरहेको छ ।
कार्यालयको भवन निर्माणको लागि सुल्डाँडा र अक्षेते वरीपरि जग्गाको खोजी भईरहेको गाउँपालिका अध्यक्ष अमर थापाले जानकारी दिनुभयो । उहाँले यस आर्थिक वर्षभित्र जग्गाको व्यवस्थपन गरि आफ्नो कार्याकालसम्म भवन निर्माणको कामलाई अगाडी बढाउने बताउनुभयो ।
गाउँपालिकाले अहिले २ ओटा घरको पाँच ओटा फल्याट भाडामा ल्याएर कार्यालय संचालन गरिरहेको गाउँपालिकाका प्रमुख प्रशासकीय अधिकृत खिम बहादुर वि.क.ले जानकारी दिनुभयो । विकका अनुसार गाउँपालिकाको कार्यालयको लागि ३ ओटा फ्ल्याट ल्याइएको छभने अन्य स्वास्थ्य, कृषि, भेटनेरि लगायतका शाखाहरुको लागि २ ओटा फ्ल्याट ल्याएर कार्यालय व्यवस्थापन गरिएको छ । दुई वटा घरमा कार्यालय संचालन गर्दैगर्दा सेवा संचालनमा समस्या भैरहेको अधिकृत विकले बताउनुभयो ।
यस्तै गाउँपालिकाका वडा नम्बर १, ५ र ६ को पनि आफ्नै कार्यालय छैनन् । तीन वटै कार्यालयहरु भाडाको घरहरुबाट संचालन भइरहेका छन् । गाउँपालिकाले आफ्नै कार्यालय, तीन वटा वडा कार्यालय र वडा नम्बर ३ को स्वास्थ्य इकाइको गरि मासिक ८५ हजार रुपैयाँ भाडा तिर्दै आएको छ ।
काठेखोला गाउँपालिकाका वडा नम्बर ५ र ६ ले जग्गा व्यवस्थापन गरिसकेका छन् । जग्गा वडाको नाममा ल्याउन काम अगाडी बढाइरहेको वडाअध्यक्षहरु बताउछन ।
२०७६ साउन २० गते प्रकाशित
वि.सं.२०७६ साउन २० सोमवार ११:२८ मा प्रकाशित
