काठमाडौं । म्याग्दीमा निर्माणाधीन ४२ मेगावाटको मिस्त्री खोला जलविद्युत आयोजनाले अबको २ महिनामा विद्युत उत्पादन सुरु गर्ने भएको छ ।
९० प्रतिशत निर्माण पूरा भएको आयोजनाबाट आगामी असोज अन्त्यबाट विद्युत उत्पादन सुरु हुन लागेको हो । २०७३ साउनदेखि निर्माण सुरु भएको आयोजनाको काम अन्तिम चरणमा पुगेको व्यवस्थापक विजेन्द्रलाल राजभण्डारीले बताए । उनका अनुसार बाँध क्षेत्रको निर्माण पूरा भएको छ ।
अहिले सुरुङ र विद्युतगृहमा समानरूपले काम भइरहेको छ । खनेर सकिएको २.३ किलोमिटर लामो मुख्य सुरुङमा ढलान भइरहेको उनले बताए । विद्युतगृहमा इलेक्ट्रोमेकानिकल उपकरण जडानको काम धमाधम भइरहेको छ । बाँकी काम सम्पन्न गरेर विद्युत उत्पादन सुरु गर्न अझै २ महिना लाग्ने पनि राजभण्डारीले बताए ।
यसअघि आयोजनाबाट भदौदेखि विद्युत उत्पादन गर्ने तालिका थियो । तर, सुरुङ ढलानका क्रममा समस्या देखिएपछि उत्पादन तालिका एक महिना लम्बिएको छ। आयोजनाबाट उत्पादन हुने विद्युत नेपाल विद्युत प्राधिकरणको दाना सबस्टेसनमा लगेर जोडिनेछ । दाना सबस्टेसनसम्म आवश्यक ४ किलोमिटर लामो प्रसारण लाइन कम्पनी आफैंले निर्माण गरिरहेको छ ।
आयोजना सम्पन्न गर्न ६ अर्ब रुपैयाँ लागत अनुमान गरिएको छ । आयोजनामा नविल बैंकको अगुवाइमा ६ बैंक तथा वित्तिय संस्थाले ४ अर्ब २० करोड रुपैयाँ ऋण लगानी गरेका छन ।
२०७६ साउन २७ गते प्रकाशित
वि.सं.२०७६ साउन २७ सोमवार १७:११ मा प्रकाशित
