काठमाडौँ । यस वर्ष ९४.४३ प्रतिशत धान रोपाइँ भएको छ । कृषि तथा पशुपक्षी विकास मन्त्रालयले दिएको भदौ १ सम्मको तथ्याङ्कअनुसार देशभर १२ लाख ९५ हजार २८२ हेक्टरमा ९४.४३ प्रतिशत रोपाइँ भएको छ ।
नेपालमा १३ लाख ७१ हजार ७०६ हेक्टरमा धान खेती हुन्छ । गत वर्ष यही समयसम्म ९५.३९ प्रतिशत रोपाइँ भएको थियो । गत वर्षको तुलनामा यस वर्ष ०.९६ प्रतिशत कम रोपाइँ भएको छ ।
गत वर्ष यो समयमा १३ लाख आठ हजार ५०० हेक्टरमा ९५.३९ प्रतिशत रोपाइँ हुँदा ५६ लाख १० हजार मेट्रिक टन धान उत्पादन भएको थियो । उत्पादन भएको त्यही वृद्धिका कारण कृषि तथा पशुपक्षी मन्त्रालय उत्साहित भएर आव २०७६/७७ वर्षमा ६० लाख मेट्रिक टन उत्पादन गर्ने लक्ष्य लिएको छ ।
बाढीका कारण ढिलो रोपाइँ, सिँचाइ तथा मलको अभावका कारण लिएको लक्ष्य पूरा नहुने हो कि भन्ने आशङ्का कृषि विभागमा महानिर्देशक सूर्यप्रसाद पौडेलले गर्नुभयो ।
भन्नुभयो, साउन २० देखि २५ गतेसम्मको रोपाइँ राम्रो मानिन्छ तर बाढीका कारण रोपाइँ ढिलो भएको छ, त्यही भएर गत वर्षभन्दा कम उत्पादन हुने हो कि आशङ्का छ ।
यद्यपि उहाँले समयमा मल, सिँचाइ र गोडमेल भयो भने गत वर्ष जतिकै उत्पादन हुनेमा आफूहरू विश्वस्त रहेको बताउनुभयो ।
२०७६ भदौ ३ गते प्रकाशित
वि.सं.२०७६ भदौ ३ मंगलवार १०:३१ मा प्रकाशित