काठमाडौं । प्रतिनिधिसभाको बैठकले ‘विज्ञापन (नियमन गर्ने) विधेयक, २०७६’ लाई बहुमतले पारित गरेको छ ।
सञ्चार तथा सूचना प्रविधि मन्त्री गोकुल बाँस्कोटाले प्रस्तुत गर्नुभएको विधेयक पारित भएको हो। विधेयकमाथि सांसदहरूले उठाउनुभएको जिज्ञासाको जबाफ दिँदै मन्त्री बाँस्कोटाले सबैलाई समानुपातिकरूपमा विज्ञापन उपलब्ध गराउने विश्वास व्यक्त गर्नुभयो ।
सरकारको समर्थनमा रहनेलाई मात्रै विज्ञापन उपलब्ध गराउने भन्ने प्रचारसमेत गलत रहेको बताउँदै उहाँले भन्नुभयो– ‘सरकारको भजन गाउनेलाई मात्र विज्ञापन दिने कुरा किमार्थ हुँदैन, त्यसलाई हामी व्यवहारमा नै देखाउँछौं।’
विधेयकले भ्रष्टाचार रोक्ने, कर छल्नेलाई नियन्त्रण गर्ने र कुन संस्थाले के कति मात्रामा विज्ञापनमा खर्च गर्छ भन्ने विषय पारदर्शी हुने बताउँदै विज्ञापन विधेयक नेपालको हकमा नयाँ विषय समेटिएको कानुन भएको बताउनुभयो ।
विधेयकले समानुपातिक विज्ञापन प्रणाली र क्लिन फिडलाई समेत समेटेको उल्लेख गर्दै कानुनअनुसार दर्ता भएका सञ्चारमाध्यमले राज्यका तर्फबाट ‘इन्सेन्टिभ’ दिने व्यवस्था गरेको बताउनुभयो ।
२०७६ भदौ १३ गते प्रकाशित
वि.सं.२०७६ भदौ १३ शुक्रवार ०८:४३ मा प्रकाशित