काठमाडौं । नेपाल टेलिकमको फोर–जी सेवा ३७ वटा जिल्लामा विस्तार भएको छ । नेपाल टेलिकमका अनु्सार बिहीबारसम्ममा ६० वटा जिल्लामा यो सेवा पुगेको छ ।
फोर–जी सेवाका लागि ८०० मेगाहर्ज र १८०० मेगाहर्जको फ्रिक्वेन्सी ब्यान्ड सञ्चालन गरिएको छ । सेवा विस्तारसँगै २३०० मेगाहर्ज पनि सञ्चालन गर्दै जाने बताइएको छ ।
टेलिकमले प्रयोग गरेको फोर–जी एलटीई एडभान्सड ४.५ जी हो । यसभअघि काठमाडौंमा चलेको भन्दा निकै बढी डाटा स्पिड प्राप्त हुने बताइएको छ ।
परीक्षणको क्रममा हासिल भएको अधिकतम डाटा स्पिड २४७ एमबीपीएस रहेको टेलिकमका प्रवक्ता प्रतिभा वैद्यले बताउनुभयो ।
सन् २०१६ मा प्रकाशित विश्व विकास प्रतिवेदनले ब्रोडब्यान्ड सेवाको १० प्रतिशत विस्तारले विकासशील देशको कूल गार्हस्थ उत्पादनमा १.३८ प्रतिशत वृद्धि हुने देखाएको थियो ।
काठमाडौं र पोखरामा मात्रै कुल ८ लाख बढी ग्राहक रहेकोमा देशव्यापी विस्तार पश्चात् सो संख्यामा उल्लेख्य वृद्धि हुने अपेक्षा गरिएको छ ।
मुलुकमा डिजिटलाइज्ड लाइफ स्टाइल र स्मार्ट सोसाइटीको पूर्वाधार तयार पार्नका लागि फोर–जीले आम जनताको जीवनस्तरको सुधार हुने अपेक्षा पनि गरिएको छ ।
नेपाल टेलिकमका अनुसार धनकुटा, झापा, मोरङ, सुनसरी, बारा, चितवन, धादिङ, धनुषा जिल्लामा यो सेवा पुगेको छ ।यसैगरी दोलखा, काभ्रेपलाञ्चोक, महोत्तरी, मकवानपुर, नुवाकोट, पर्सा, रामेछाप, रसुवा र रौतहटमा पनि फोर–जी पुगेको छ ।
त्यस्तै, सर्लाही, सिन्धुली, बागलुङ, कपिलवस्तु, म्याग्दी, नवलपरासी, पाल्पा, पर्वतमा पनि फोर–जी सञ्चालनमा आएको छ । रूपन्देही, बाँके, बर्दिया, दाङ, सुर्खेत, कैलाली, कञ्चनपुर, तनहुँ, मुस्ताङ, लमजुङ, सप्तरी र सिराहामा गरी ३७ जिल्लामा यो सेवा पुगेको छ ।
टेलिकमका प्रवक्ता वैधका अनुसार यो जिल्लाका ६० भन्दा बढी सहरमा फोर–जी सेवा बिहीबार चलेको छ ।
२०७६ असोज १७ गते प्रकाशित
वि.सं.२०७६ असोज १७ शुक्रवार ०८:१३ मा प्रकाशित
