२०७६ असोज २६ गते प्रकाशित
काठमाडौं । कर्मचारी अभावले लाइसेन्स नविकरण हुन सकेको छैन । बन्दीपुर गाउँपालिका १ चिसापानी डुम्रेस्थित यातायात व्यवस्था सेवा कार्यालयले सवारी कर, रुट इजाजत लिन, सवारीसाधन आयकर अशुल गर्दै आएको छ । यस कार्यालयबाट लाइसेन्स नवीकरणको काम गर्ने अनुमति पाएको छ ।
गण्डकी प्रदेश सरकारको भदौ २५ गते बसेको मन्त्री स्तरीय निर्णयले यस कार्यालयबाट लाइसेन्स नवीकरणको काम गर्न अनुमति दिइएको छ । भौतिक पूर्वाधार विकास मन्त्रालयले निर्णय गरेपनि कर्मचारी नपठाउँदा लाइसेन्स नवीकरणको काम भने गर्न सकेको छैन ।
कार्यालयमा लाइसेन्स नवीकरणका लागि पुगेका सेवाग्राहीको काम हुन सकेको छैन । यातायात व्यवस्था सेवा कार्यालयले कम्प्युटर अपरेटर नहुँदा नवीकरणको काममा समस्या भएको जनाएको छ ।
कार्यालयमा लाइसेन्स नवीकरणको कामका लागि कम्प्युटर अपरेटरको अभावले गर्दा नवीकरण गर्न आएका सेवाग्राही फर्किन बाध्यता छन । सवारी कर, सवारी इजाजत नविकरण, रुट इजाजत लिन, सवारी साधन आय कर तिर्न सकिने कार्यालयलाई लाइलेन्स नवीकरण गर्न पाउने अधिकार दिइएको छ । ‘अधिकार पायो तर कर्मचारी आएनन’, कार्यालय प्रमुख विश्वकुमार श्रेष्ठले भन्नुभयो, ‘लाइसेन्स नवीकरणको लागि कम्प्युटर अपरेटर चाहिन्छ ।
हामीसँग कम्प्युटर अपरेटरको काममा दख्खल भएको कर्मचारी छैन । काम गर्न समेत सकिएको छैन ।’ कर्मचारी नआएकोले कम्प्युटर अपरेटरको तालिम लिनको लागि एक जना कर्मचारी खटाउने तयारी भइरहेको श्रेष्ठले बताउनुभयो । ‘करारमा कर्मचारी राख्ने अधिकार हामीसँग छैन ।
विभागले पनि कर्मचारी पठाउन सकेका छैनन’, श्रेष्ठ भन्नुभयो,’अनलार्नबाटै काम गर्नुपर्ने हुन्छ । अपरेटरको काम गर्नका लागि यहाँ भएका कर्मचारीमा त्यस्तो दख्खल छैन । त्यसैले काम गर्न सकेका छैनन ।’
कार्यालयमा हाल ८ जनाको दरबन्दी रहेको छ । काम थपिए पनि दरबन्दी भने थप नभएको उहाँले बताउनुभयो । सरकारको नीति तथा निर्णय बमोजिम दिनानुदिन बढ्दै गएको सवारीको चापलाई व्यवस्थित गर्न, सेवाग्राहीलाई सर्वसुलभ तथा सहज रुपबाट सेवा प्रवाह गर्न डुम्रेमा कार्यालय स्थापना गरिएको हो ।
डुम्रेमा कार्यालय स्थापना हुँदा यातायात कार्यालयहरूमा देखिएको भिडलाई केही हदसम्म सहज रुपमा सेवा प्रदान गर्न मद्दत पु्गेको छ । यहाँ कार्यालय स्थापना भएपछि विशेष गरी तनहुँ लगायत लमजुङ, मनाङ, गोरखा, चितवनको मुग्लिन, कुरिनटार, धादिङका केही भाग र तनहुँको कोत्रेसँग जोडिएको कास्कीको क्षेत्रलाई सेवा दिन सहज भएको छ ।
हाल दैनिक कम्तिमा १०० देखि १५० जना सेवाग्राही आउने गरेको कार्यालयका अधिकृत कमल कँडेलले जानकारी दिनुभयो । डुम्रेबाट सम्पूर्ण सेवा दिइने भएपछि सेवाग्राहीको चाप भने बढ्नेछ ।
वि.सं.२०७६ असोज २५ शनिवार २०:१२ मा प्रकाशित