काठमाडौं । निर्वाचन आयोगले मंसिरमा १४ मा हुने उपनिर्वाचनको कार्यतालिका सार्वजनिक गरेको छ । विभिन्न कारणले प्रतिनिधिसभा सदस्य, प्रदेशसभा सदस्य र स्थानीय तहमा रिक्त ५२ स्थानका लागि मंसिर १४ मा हुने उपनिर्वाचनका लागि आयोगले शुक्रबार निर्वाचन कार्यतालिका सार्वजनिक गरेको हो ।
मंसिर १४ मा प्रतिनिधिसभा सदस्य एकजना, प्रदेश सभा सदस्य तीनजना र ४८ स्थानीय तहका जनप्रतिनिधि चयनका लागि निर्वाचन हुन लागेको हो ।
आयोगले सार्वजनिक गरेको कार्यतालिकाअनुसार रिक्त प्रतिनिधिसभा र प्रदेश सभाका सदस्यका लागि २१ कात्तिकमा उम्मेदवारको मनोनयनपत्र दर्ता, उम्मेदवारको विरोधमा उजुरी दिन २२ गते बिहान ११ बजेदेखि साँझ ५ बजेसम्म, २३ गते बिहान ११ बजेदेखि दिउँसो साढे एक बजेसम्म मनोनयनपत्र दर्ता र उजुरीमाथि जाँचबुझ तथा ३ बजेदेखि ५ बजेसम्म उम्मेदवारको नामावली प्रकाशन गर्ने, २४ गते बिहान १० बजेदेखि दिउँसो १ बजेसम्म उम्मेदवारले नाम फिर्ता लिने र सोही दिन साँझ ५ बजे उम्मेदवारको अन्तिम नामावली प्रकाशन समय निर्धारण गरिएको छ ।
यसैगरी आयोगले सार्वजनिक गरेका कार्यतालिका अनुसार २५ कात्तिकमा ११ बजेदेखि अपराह्न ४ बजेसम्ममा उम्मेदवारलाई निर्वाचन चिह्न प्रदान गर्ने र मंसिर १४ गते बिहान ७ बजेदेखि साँझ ५ बजेसम्म मतदान हुनेछ ।
स्थानीय तहमा रिक्त ४८ पदका लागि भने कात्तिक २७ गते उम्मेदवारका लागि समयतालिका तोकिएको छ । उनीहरूका लागि ३० गते उम्मेदवारको अन्तिम नामावली प्रकाशन गर्ने, १ मंसिरमा उम्मेदवारलाई निर्वाचन चिह्न प्रदान गर्ने र १४ मंसिर बिहान ७ बजेदेखि साँझ ५ बजेसम्म मतदान गर्ने समय निर्धारण गरिएको छ ।
हाल प्रतिनिधिसभातर्फ कास्की २ र प्रदेश सभातर्फ भक्तपुर १ ‘क’, बाग्लुङ २ ‘ख’ तथा दाङ ३ ‘ख’ र स्थानीय तहका ४८ पद रिक्त रहेका छन ।
२०७६ कात्तिक ०२ गते प्रकाशित
वि.सं.२०७६ कात्तिक २ शनिवार १४:५३ मा प्रकाशित
