काठमाडौं । स्वास्थ्य क्लबको बाथरुममा नुहाउने क्रममा निसास्सिएर दम्पतीको मृत्यु भएको छ । मृत्यु हुनेमा ४२ वर्षीय हस्त गर्बुजामगर र उनकी श्रीमती ३९ वर्षीया नेत्रकुमारी रहेका छन् ।
ललितपुर महानगरीय प्रहरी परिसरका प्रमुख एसएसपी टेकप्रसाद राईका अनुसार मगर दम्पती ललितपुरको तिखेदेवलस्थित फिट एन्ड फाइन एरोबिक क्लबको साउनामा नुहाउने क्रममा सो घटना भएको हो ।
उनीहरू बुधबार राति सो क्लबमा नुहाउन गएकोमा लामो समयसम्म ननिस्केपछि ढोका खोलेर हेर्दा बेहोस फेला परेका थिए । उनीहरुलाई तत्काल उद्धार गरी पाटन अस्पताल लगिएकोमा त्यहीँ मृत घोषणा गरिएको थियो ।
अक्सिजन नपुगेर मृत्यु भएको प्रारम्भिक अनुसन्धानले देखाएको प्रहरीले जनाएको छ । साउनामा नुहाउँदा निश्चित समयमा निस्किनुपर्ने हुन्छ । हस्त गर्बुजामगर पूर्वमहिला, बालबालिका तथा जेष्ठ नागरिकमन्त्री थममाया थापाका स्वकीय सचिव (पीए) थिए ।
२०७६ माघ १६ गते प्रकाशित
वि.सं.२०७६ माघ १६ बिहीवार ०९:५० मा प्रकाशित
