काठमाडौं । राष्ट्रिय योजना आयोगका उपाध्यक्ष प्रा.डा. पुष्पराज कँडेलले बर्तमान सरकारले नागरिक समाजलाई नियन्त्रण गर्दैछ भन्ने भ्रमबाट मुक्त हुन नागरिक समाजका अगुवालाई आग्रह गर्नुभएको छ ।
मंगलबार राष्ट्रिय योजना आयोगद्वारा आयोजित नागरिक समाजसंगको अन्तरक्रियामा उपाध्यक्ष कँडेलले सरकार र नागरिक समाज एक आपसमा साझेदारको रुपमा दिगो विकास लक्ष्य हासिल गर्न सहकार्य गरेर अगाडी बढ्नुपर्ने आवश्यकता रहेको बताउनुभयो ।
१५औं योजनाले लिएका लक्ष्य, उद्देश्य र रणनीति कार्यान्वयनका निमित्त सामाजिक क्षेत्रसंगको साझेदारी तथा सामाजिक क्षेत्रका सवालहरुको सम्वोधन कसरी गर्न सकिन्छ भन्ने विषयमा गरिएको अन्तरक्रियामा गैरसरकारी संस्था महासंघ, सामुदायिक वन उपभोक्ता महासंघ, रानेपानी उपभोक्ता महासंघ, राष्ट्रिय जेष्ठ नागरिक महासंघ, महिला, बालबालिका, दलित, सिमान्तकृत, किसान, भूमिहिन लगायतको क्षेत्रमा कार्यरत संघ संस्थाका अगुवाहरुको प्रतिनिधित्व रहेको थियो ।
नागरिक अगुवाहरुले सरकारले साझेदारको रुपमा स्वीकार गरी सहकार्य गरेकोमा खुशी व्यक्त गर्दै दिगो विकास लक्ष्य हासिल गर्न नागरिक समाजले महत्वपूर्ण भूमिका निर्वाह गर्ने बताउनुभयो ।
कार्यक्रममा राष्ट्रिय योजना आयोगमा सामाजिक क्षेत्र हेर्ने सदस्य मीनबहादुर शाहीले उठेका सवाललाई आगामी दिनमा नीति तथा योजना मार्फत सम्वोधन गर्दै लैजाने बताउनुभयो ।
वि.सं.२०७६ माघ २१ मंगलवार १९:४८ मा प्रकाशित