काठमाडौं– चिनियाँ स्वास्थ्य अधिकारीहरुले कोभिड–१९ (कोरोनाभाइरस) का ७० हजारभन्दा बढी बिरामीको विस्तृत विवरण पहिलोपटक सार्वजनिक गरेका छन् ।
चाइनिज सेन्टर फर डिजेज कन्ट्रोल एन्ड प्रिभेन्सन (सिसिडिसी)को तथ्यांकले कोरोनाभाइरस संक्रमितमध्ये ८० प्रतिशत सामान्य बिरामी मात्र हुने र बुढेसकाल लागेका व्यक्तिहरु बढी जोखिममा रहेको देखाएको छ । उक्त अध्ययनले स्वास्थ्यकर्मीहरु संक्रमणको बढी जोखिममा रहने देखाएको छ ।
अध्ययनले कोरोनाभाइरस संक्रमितमध्ये २.३ प्रतिशतको मात्र मृत्यु भएको देखाएको छ । यो भाइरसबाट सबैभन्दा बढी प्रभावित चीनको हुबेई प्रान्तमा मृत्युदर २.९ प्रतिशत छ भने अन्य मुलुकको मृत्युदर ०.४ प्रतिशत मात्र छ ।
ताजा तथ्यांक अनुसार यो भाइरसले अहिलेसम्म १८ सय ७३ जनाको ज्यान लिएको छ । संक्रमितको संख्या ७३ हजार ४३३ छ । १२ हजार ६७७ जना उपचारपछि संक्रमणमुक्तभ एका छन् ।
अध्ययनले ८०.९ प्रतिशत संक्रमणलाई सामान्य, १३.८ प्रतिशतलाई गम्भीर र ४.७ प्रतिशतलाई चिन्ताजनक भनेको छ । यो संक्रमणबाट ज्यान गुमाउनेमा ८० वर्ष नाघेका व्यक्तिहरु बढी छन् । ८० भन्दा माथिको उमेर समूहका संक्रमितमध्ये १४.८ प्रतिशतको ज्यान गएको छ ।
त्यसैगरी, ९ वर्षसम्मका बालबालिका र ३९ वर्षसम्ममा व्यक्तिको मृत्युदर ज्यादै कम छ । यो उमेर समूहका संक्रमितमध्ये ०.२ प्रतिशतको मात्रै ज्यान गएको छ ।
४० देखि ४९ वर्ष उमेर समूहका संक्रमितमा मृत्युदर ०.४ प्रतिशत छ भने ५० देखि ६९ वर्ष उमेर समूहमा १.३ प्रतिशत छ । ६० देखि ६९ वर्ष उमेर समूहका संक्रमितमध्ये ३.६ प्रतिशतको ज्यान गएको छ । ७० देखि ७९ वर्ष उमेर समूहका ८ प्रतिशत संक्रमितको ज्यान गएको अध्ययनले देखाएको छ ।
लैंगिक हिसाबले हेर्दा यसबाट मर्ने महिलाभन्दा पुरुष धेरै छन् । संक्रमितमध्ये औसत २.८ प्रतिशत पुरुषको ज्यान गएको छ । महिलातर्फ ज्यान गुमाउने प्रतिशत १.७ प्रतिशत मात्र छ ।
वि.सं.२०७६ फागुन ६ मंगलवार १३:१८ मा प्रकाशित
